20 వేలు లంచం తీసుకుంటూ ఏసీబీకి చిక్కిన కొల్లూరు పోలీస్ స్టేషన్ ఎస్‌ఐ

సంగారెడ్డి / సైబరాబాద్ | జనవరి 02: సైబరాబాద్ పోలీస్ కమిషనరేట్ పరిధిలోని కొల్లూరు రక్షకభట నిలయంలో పనిచేస్తున్న సబ్‌ ఇన్‌స్పెక్టర్ ఎం. రమేష్ లంచం తీసుకుంటూ తెలంగాణ అవినీతి నిరోధక శాఖ (ఏసీబీ) అధికారులకు పట్టుబడ్డాడు.

ఫిర్యాదుధారునిపై కొల్లూరు పోలీస్ స్టేషన్‌లో నమోదైన ఒక కేసు నుండి అతని పేరును తొలగిస్తానని హామీ ఇస్తూ, ఎస్‌ఐ రమేష్ మొదటగా రూ.30,000 లంచం డిమాండ్ చేసినట్లు సమాచారం. ఈ క్రమంలో ఇప్పటికే ఫిర్యాదుధారుని నుండి రూ.5,000 తీసుకున్నాడు. మిగిలిన మొత్తంలో భాగంగా రూ.20,000 లంచం తీసుకుంటున్న సమయంలో ఏసీబీ అధికారులు రెడ్‌హ్యాండెడ్‌గా పట్టుకున్నారు.

ఈ ఘటనపై ఏసీబీ అధికారులు కేసు నమోదు చేసి దర్యాప్తు చేపట్టారు. ప్రభుత్వ ఉద్యోగులు లంచం కోరినట్లయితే ప్రజలు భయపడకుండా ముందుకు వచ్చి ఫిర్యాదు చేయాలని ఏసీబీ అధికారులు సూచించారు.