కీలక సర్క్యూలర్ జారీ చేసిన రాష్ట్ర ఎన్నికల సంఘం

తెలంగాణలో మున్సిపల్ ఎన్నికల నేపథ్యంలో మేయర్, డిప్యూటీ మేయర్, చైర్మన్, వైస్ చైర్మన్ ఎన్నికలకు సంబంధించి రాష్ట్ర ఎన్నికల సంఘం (SEC) కీలక సర్క్యూలర్‌ను జారీ చేసింది. గుర్తింపు పొందిన రాజకీయ పార్టీల తరఫున ఎన్నికైన సభ్యులు పార్టీ విప్‌ను తప్పనిసరిగా పాటించాల్సిందేనని, విప్‌ను ధిక్కరిస్తే కఠిన చర్యలు తప్పవని స్పష్టం చేసింది.

ఫిబ్రవరి 16న ప్రత్యేక కౌన్సిల్ సమావేశాలు

ఈ నెల 16వ తేదీన జిల్లా కలెక్టర్ ఆదేశాల మేరకు ప్రత్యేక కౌన్సిల్ సమావేశాలు నిర్వహించనున్నారు.

మున్సిపల్ కార్పొరేషన్లలో మేయర్, డిప్యూటీ మేయర్
మున్సిపాలిటీల్లో చైర్మన్, వైస్ చైర్మన్ ఎన్నికలు జరగనున్నాయి.

విప్ ధిక్కరిస్తే అనర్హత తప్పదు

రాష్ట్ర ఎన్నికల సంఘం జారీ చేసిన సర్క్యూలర్ ప్రకారం:

పార్టీ విప్‌ను ధిక్కరించిన సభ్యుడి వివరాలను, ఎన్నిక జరిగిన తేదీ నుంచి మూడు రోజుల్లోపు పార్టీ విప్‌గా నియమితుడైన వ్యక్తి జిల్లా కలెక్టర్ ద్వారా గుర్తించబడిన అధికారికి రాతపూర్వకంగా నివేదించాలి.
నివేదిక అందిన అనంతరం సంబంధిత సభ్యుడికి షోకాజ్ నోటీసు జారీ చేయాలి.
నోటీసు తేదీ నుంచి ఏడు రోజులలోపు వివరణ ఇవ్వాలని కోరాలి.

రెండు రోజుల్లో తుది ఉత్తర్వులు

సభ్యుడు ఇచ్చిన వివరణను పరిగణనలోకి తీసుకుని, జిల్లా కలెక్టర్ చేత గుర్తించబడిన అధికారి రెండు రోజుల్లోపు తుది ఉత్తర్వులు జారీ చేయాలి.
ఏడు రోజుల గడువులో వివరణ ఇవ్వకపోతే, అందుబాటులో ఉన్న ఆధారాల ఆధారంగా రెండు రోజుల్లో నిర్ణయం తీసుకోవాల్సి ఉంటుంది.
విప్‌ను ఉల్లంఘించినట్లు తేలితే సభ్యత్వం రద్దు చేసే అవకాశం ఉంటుంది.

ఎన్నికల అధికారులకు శిక్షణ

మేయర్, డిప్యూటీ మేయర్, చైర్మన్, వైస్ చైర్మన్ ఎన్నికలు నిర్వహించేందుకు నియమించిన అధికారులకు రాష్ట్ర ఎన్నికల సంఘం శిక్షణ కార్యక్రమం నిర్వహించింది. మాస్టర్ ట్రైనీల ద్వారా వర్చువల్ విధానంలో శిక్షణ ఇచ్చినట్లు ఎస్‌ఈసీ వెల్లడించింది.