తెలంగాణ ప్రజా జాగృతి పేరుతో కవిత కొత్త పార్టీ?
హైదరాబాద్, మార్చి 25: తెలంగాణ రాజకీయాల్లో మరో కీలక పరిణామం చోటుచేసుకునే అవకాశాలు కనిపిస్తున్నాయి. కల్వకుంట్ల కవిత కొత్త రాజకీయ పార్టీ ఏర్పాటు దిశగా వేగంగా అడుగులు వేస్తున్నట్లు సమాచారం. “తెలంగాణ ప్రజా జాగృతి” పేరుతోనే పార్టీని ప్రారంభించే యోచనలో ఉన్నట్లు ఆమె సంకేతాలు ఇచ్చారు.
పార్టీ స్థాపనకు సంబంధించి అన్ని ఏర్పాట్లు జరుగుతున్నాయని, త్వరలోనే అధికారిక ప్రకటన చేస్తానని కవిత తెలిపారు. పార్టీ అజెండాపై లోతైన చర్చలు జరుగుతున్నాయని, ముఖ్యంగా మహాత్మా గాంధీ సర్వోదయ సిద్ధాంతాన్ని ఆధారంగా తీసుకుని ముందుకు సాగుతామని వెల్లడించారు.
నిజామాబాద్ జిల్లాలో పార్టీ కార్యకలాపాలకు శ్రీకారం చుట్టే అవకాశాలు ఉన్నాయని తెలుస్తోంది. పార్టీ కార్యాలయం కోసం స్థలాన్ని కూడా అన్వేషిస్తున్నట్లు ఆమె చెప్పారు.
ఇక తన రాజకీయ పోరాటం ఎవరిపై ఉంటుందో కూడా కవిత స్పష్టం చేశారు. “డాడీ, మోడీ, చిన్న మోడీ”పై పోరాటం కొనసాగిస్తానని, ఎలాంటి రాజీ ఉండదని తెలిపారు. బీఆర్ఎస్తో ఉన్న విభేదాలను కాంగ్రెస్, ముఖ్యంగా ముఖ్యమంత్రి రేవంత్ రెడ్డి రాజకీయంగా వినియోగిస్తున్నారని ఆమె ఆరోపించారు.
శ్రీరామనవమి తర్వాత పార్టీ ప్రకటన ఉండే అవకాశం ఉందని, అంతకుముందే జాతీయ స్థాయి నేతలను కలుస్తానని కవిత వెల్లడించారు. తెలంగాణ ఉద్యమంలో పాల్గొన్న యువతకు తన పార్టీలో ప్రాధాన్యం ఇస్తానని ఆమె స్పష్టం చేశారు.
కొత్త పార్టీ ప్రభావం ముఖ్యంగా ఆదిలాబాద్, నిజామాబాద్, ఖమ్మం జిల్లాల్లో ఎక్కువగా ఉండొచ్చని కవిత అంచనా వేస్తున్నారు. రాష్ట్రవ్యాప్తంగా పలు ప్రాంతాల నుంచి పోటీ చేయాలని ప్రజలు కోరుతున్నారని, వనపర్తి నుంచి కూడా పోటీ చేయాలని కార్యకర్తలు అభ్యర్థిస్తున్నారని తెలిపారు.
Post a Comment