మేడ్చల్ పారిశ్రామికవాడలో భారీ అగ్ని ప్రమాదం.. పేలిన కెమికల్ డ్రమ్ములు

 

మేడ్చల్ పారిశ్రామికవాడలో మంగళవారం భారీ అగ్ని ప్రమాదం చోటుచేసుకుంది. పరిశ్రమలో నిల్వ ఉంచిన కెమికల్ డ్రమ్ముల్లో ఒక్కసారిగా రసాయన చర్యలు జరగడంతో ఈ ప్రమాదం సంభవించినట్లు సమాచారం. డ్రమ్ములు భారీ శబ్దాలతో పేలిపోవడంతో క్షణాల్లోనే మంటలు ఫ్యాక్టరీ అంతటా వ్యాపించాయి.

అగ్నిప్రమాదం కారణంగా ఫ్యాక్టరీ పరిసర ప్రాంతాల్లో దట్టమైన పొగలు వ్యాపించాయి. దీంతో స్థానికులు తీవ్ర భయాందోళనలకు గురయ్యారు. ప్రమాద సమాచారం అందుకున్న వెంటనే పోలీసులు, అగ్నిమాపక సిబ్బంది సంఘటనా స్థలానికి చేరుకొని సహాయక చర్యలు చేపట్టారు. గంటల పాటు శ్రమించి మంటలను అదుపులోకి తీసుకువచ్చారు.

ప్రమాదం జరిగిన సమయంలో ఫ్యాక్టరీలో పనిచేస్తున్న కార్మికులు, సిబ్బంది అప్రమత్తమై వెంటనే బయటకు పరుగులు తీయడంతో పెను ప్రమాదం తప్పింది. ఈ ఘటనలో ఎలాంటి ప్రాణనష్టం జరగలేదని అధికారులు తెలిపారు.

అగ్ని ప్రమాదానికి గల ఖచ్చితమైన కారణాలపై పోలీసులు కేసు నమోదు చేసి దర్యాప్తు ప్రారంభించారు. పరిశ్రమలో భద్రతా ప్రమాణాలు పాటించారా లేదా అనే అంశాలపై కూడా విచారణ చేపడుతున్నారు.