తెలంగాణలో 7 జిల్లాలకు వాతావరణ హెచ్చరిక

హైదరాబాద్, జూన్ 12: తెలంగాణ రాష్ట్ర వాతావరణ విభాగం (TGiCCC) రాష్ట్రంలోని 7 జిల్లాలకు తక్షణ వాతావరణ హెచ్చరిక జారీ చేసింది. రాబోయే మూడు గంటల పాటు ఆయా జిల్లాల్లో ఉరుములు, మెరుపులతో కూడిన మోస్తరు నుంచి భారీ వర్షాలు కురిసే అవకాశం ఉందని తెలిపింది.

హెచ్చరిక జారీ చేసిన జిల్లాలు:

హనుమకొండ
జనగామ
జయశంకర్ భూపాలపల్లి
మహబూబాబాద్
సిద్దిపేట
వరంగల్
యాదాద్రి భువనగిరి

అధికారుల సమాచారం ప్రకారం, గంటకు 50–60 కిలోమీటర్ల వేగంతో బలమైన ఈదురు గాలులు వీచే అవకాశం ఉంది. దీంతో చెట్లు, విద్యుత్ స్తంభాలు, హోర్డింగులు కూలిపోయే ప్రమాదం ఉండటంతో ప్రజలు అప్రమత్తంగా ఉండాలని సూచించారు.

అత్యవసరమైతే తప్ప బయటకు వెళ్లకూడదని, వాహనదారులు తమ ప్రయాణాలను తాత్కాలికంగా వాయిదా వేసుకోవాలని వాతావరణ శాఖ సూచించింది. ఉరుములు, మెరుపులు సంభవించే సమయంలో చెట్ల కింద నిలబడకుండా, విద్యుత్ తీగలు, స్తంభాలకు దూరంగా ఉండాలని హెచ్చరించింది.

ప్రజలు తాజా వాతావరణ సమాచారం కోసం అధికారిక హెచ్చరికలను ఎప్పటికప్పుడు గమనించాలని అధికారులు సూచించారు.