ఘోర అగ్నిప్రమాదం.. హజే కెమికల్స్‌లో రియాక్టర్ పేలుడు

 

యాదాద్రి భువనగిరి జిల్లాలో ఘోర అగ్నిప్రమాదం.. హజే కెమికల్స్‌లో రియాక్టర్ పేలుడు

పోచంపల్లి: యాదాద్రి భువనగిరి జిల్లాలో మరోసారి భారీ పారిశ్రామిక ప్రమాదం చోటుచేసుకుంది. పోచంపల్లి మండలం దొంతిగూడెం గ్రామంలోని హజే (Hazie) కెమికల్ పరిశ్రమలో శుక్రవారం రాత్రి రియాక్టర్ పేలడంతో ఒక్కసారిగా భారీగా మంటలు చెలరేగాయి. ప్రమాద సమయంలో పరిశ్రమలో పెద్ద సంఖ్యలో కార్మికులు విధుల్లో ఉన్నట్లు సమాచారం.

రియాక్టర్ పేలుడు ధాటికి పరిశ్రమలో మంటలు వేగంగా వ్యాపించాయి. దీంతో కార్మికులు తీవ్ర భయాందోళనకు గురయ్యారు. కొందరు మంటల్లో చిక్కుకుని కాలిన గాయాలకు గురైనట్లు ప్రాథమిక సమాచారం. ప్రమాదం జరిగిన వెంటనే పరిసర ప్రాంతాల్లో భయానక వాతావరణం నెలకొంది.

రియాక్టర్‌లో సాల్వెంట్ నింపుతుండగా పేలుడు?

ప్రాథమిక సమాచారం ప్రకారం.. రియాక్టర్‌లో సాల్వెంట్ నింపుతున్న సమయంలో రసాయనిక చర్య చోటుచేసుకుని ఒత్తిడి పెరగడంతో పేలుడు సంభవించినట్లు తెలుస్తోంది. అయితే ప్రమాదానికి ఖచ్చితమైన కారణాలు అధికారిక విచారణ పూర్తయిన తర్వాతే వెల్లడయ్యే అవకాశం ఉంది.

పేలుడు అనంతరం భారీగా మంటలు ఎగిసిపడటంతో స్థానికులు తీవ్ర భయాందోళనకు గురయ్యారు. సమాచారం అందుకున్న అగ్నిమాపక సిబ్బంది, పోలీసులు సంఘటనా స్థలానికి చేరుకుని సహాయక చర్యలు చేపట్టినట్లు తెలుస్తోంది.

భారీ ప్రాణనష్టంపై ఆందోళన

రాత్రి షిఫ్టులో కార్మికులు విధులు నిర్వహిస్తున్న సమయంలో ప్రమాదం జరగడంతో ప్రాణనష్టం భారీగా ఉండొచ్చన్న ఆందోళన వ్యక్తమవుతోంది. అయితే మృతులు, గాయపడిన వారి సంఖ్యపై అధికారికంగా స్పష్టత రావాల్సి ఉంది. క్షతగాత్రులను సమీపంలోని ఆస్పత్రులకు తరలించి చికిత్స అందిస్తున్నట్లు సమాచారం.

ప్రమాదం తీవ్రత, పరిశ్రమలో భద్రతా ప్రమాణాల అమలు, రియాక్టర్ పేలుడుకు దారితీసిన పరిస్థితులపై అధికారులు దర్యాప్తు చేస్తున్నారు. పూర్తి వివరాలు అధికారికంగా వెల్లడికావాల్సి ఉంది.