భద్రాచలంలో పోలీసుల కార్డాన్ అండ్ సెర్చ్ ఆపరేషన్.. 128 ఇళ్ల తనిఖీ!
భద్రాచలంలో పోలీసుల కార్డాన్ అండ్ సెర్చ్ ఆపరేషన్.. 128 ఇళ్ల తనిఖీ!
**భద్రాచలం:** భద్రాద్రి కొత్తగూడెం జిల్లాలో నేరాల నియంత్రణ, అసాంఘిక కార్యకలాపాల కట్టడి, ప్రజల భద్రతను మరింత బలోపేతం చేసేందుకు పోలీసులు ప్రత్యేక తనిఖీలు నిర్వహించారు. జిల్లా ఎస్పీ రోహిత్ రాజు ఐపీఎస్ ఆదేశాల మేరకు ఆదివారం తెల్లవారుజామున భద్రాచలం టౌన్ పోలీస్ స్టేషన్ పరిధిలోని ముదిరాజ్ బజార్ ప్రాంతంలో డీఎస్పీ అరుణ్ కుమార్ ఆధ్వర్యంలో కార్డాన్ అండ్ సెర్చ్ ఆపరేషన్ చేపట్టారు.
ఈ ఆపరేషన్లో భాగంగా ముదిరాజ్ బజార్ పరిధిలోని మొత్తం 128 ఇళ్లను పోలీసులు క్షుణ్ణంగా తనిఖీ చేశారు. ఈ సందర్భంగా సరైన వాహన పత్రాలు లేని 61 ద్విచక్ర వాహనాలు, 5 ఆటోలను గుర్తించారు. అలాగే నంబర్ ప్లేట్లు లేకుండా తిరుగుతున్న 15 వాహనాలను స్వాధీనం చేసుకున్నారు.
**మాదకద్రవ్యాలపై కఠిన చర్యలు**
ఈ సందర్భంగా డీఎస్పీ అరుణ్ కుమార్ మాట్లాడుతూ యువత మాదకద్రవ్యాలకు దూరంగా ఉండాలని సూచించారు. గంజాయి తదితర మత్తు పదార్థాల వినియోగం, విక్రయం, రవాణా వంటి చట్టవిరుద్ధ కార్యకలాపాలకు పాల్పడితే కఠిన చర్యలు తప్పవని హెచ్చరించారు. మాదకద్రవ్యాల అక్రమ కార్యకలాపాలపై సమాచారం తెలిస్తే వెంటనే పోలీసులకు తెలియజేయాలని, సమాచారం ఇచ్చిన వారి వివరాలను గోప్యంగా ఉంచుతామని తెలిపారు.
**సైబర్ నేరాలపై ప్రజలకు అవగాహన**
సైబర్ నేరగాళ్లు ఫేక్ కాల్స్, నకిలీ లింకులు, పెట్టుబడి మోసాలు, ఆన్లైన్ ఉద్యోగాల పేరుతో ప్రజలను మోసం చేస్తున్నారని వివరించారు. గుర్తుతెలియని వ్యక్తులు పంపే లింకులను క్లిక్ చేయవద్దని, ఓటీపీ, బ్యాంకు ఖాతా వివరాలు, ఏటీఎం పిన్ వంటి వ్యక్తిగత సమాచారాన్ని ఎవరికీ వెల్లడించవద్దని సూచించారు.
డిజిటల్ అరెస్ట్ పేరుతో బెదిరించే మోసగాళ్ల మాటలు నమ్మి డబ్బులు బదిలీ చేయవద్దని, సైబర్ మోసానికి గురైతే వెంటనే 1930 హెల్ప్లైన్ నంబర్కు ఫిర్యాదు చేయాలని సూచించారు.
**ట్రాఫిక్ నిబంధనలు తప్పనిసరిగా పాటించాలి**
రహదారి భద్రతపై మాట్లాడుతూ ప్రతి ద్విచక్ర వాహనదారుడు హెల్మెట్ ధరించాలని, కారులో ప్రయాణించేవారు సీటు బెల్ట్ తప్పనిసరిగా పెట్టుకోవాలని తెలిపారు. మద్యం సేవించి వాహనాలు నడపడం, అతివేగం, నిర్లక్ష్యపు డ్రైవింగ్కు దూరంగా ఉండాలని సూచించారు. ప్రతి వాహనానికి తప్పనిసరిగా నంబర్ ప్లేట్ ఉండాలని, రిజిస్ట్రేషన్, డ్రైవింగ్ లైసెన్స్, ఇన్సూరెన్స్ తదితర పత్రాలను అందుబాటులో ఉంచుకోవాలని స్పష్టం చేశారు.
ప్రజల భద్రత, శాంతిభద్రతల పరిరక్షణ కోసం ఇలాంటి తనిఖీలు, అవగాహన కార్యక్రమాలు నిరంతరం కొనసాగుతాయని పోలీసులు తెలిపారు. నేరాల నియంత్రణలో పోలీసులకు ప్రజలు సహకరించాలని కోరారు. ఈ కార్యక్రమంలో భద్రాచలం సబ్ డివిజన్కు చెందిన సీఐలు, ఎస్ఐలు, టీజీఎస్పీ, సీఆర్పీఎఫ్ సిబ్బంది, ఇతర పోలీసు అధికారులు, సిబ్బంది పాల్గొన్నారు.

Post a Comment