జనవరి 3వ తేదీన మహిళ ఉపాధ్యాయ దినోత్సవం

హైదరాబాద్: తెలంగాణ ప్రభుత్వం మరో కీలక నిర్ణయం తీసుకుంది. సావిత్రిబాయి పూలే జయంతి జనవరి 3వ తేదీని మహిళ ఉపాధ్యాయ దినోత్సవంగా ప్రకటించింది. ఈ మేరకు రాష్ట్ర ప్రభుత్వ ప్రధాన కార్యదర్శి (సీఎస్) శాంతి కుమారి గురువారం (జనవరి 2) ఉత్తర్వులు జారీ చేశారు.

ఇకపై ప్రతి ఏడాది జనవరి 3వ తేదీని మహిళ ఉపాధ్యాయ దినోత్సవంగా నిర్వహించాలని అన్ని జిల్లాల కలెక్టర్లను ఆదేశించారు. విద్యా శాఖ ఆధ్వర్యంలో ఈ కార్యక్రమాన్ని నిర్వహించాలని స్పష్టమైన సూచనలు చేశారు.

సావిత్రిబాయి పూలే సమాజంలోని మహిళా విద్య, సమానత్వానికి పాటుపడిన తొలి మహిళా ఉపాధ్యాయురాలని, ఆమె ఆత్మస్ఫూర్తితో విద్యా రంగం అభివృద్ధి చెందేందుకు ఈ నిర్ణయం తీసుకున్నామని ప్రభుత్వం పేర్కొంది.

కార్యక్రమాల నిర్వహణకు బడ్జెట్ కేటాయింపు

ఈ వేడుకల నిర్వహణకు ప్రత్యేక బడ్జెట్ కేటాయించాలని విద్యా శాఖకు ప్రభుత్వం ఆదేశాలు జారీ చేసింది. కార్యక్రమంలో భాగంగా మహిళా ఉపాధ్యాయుల కృషిని గుర్తించి అవార్డులు, ప్రశంస పత్రాలు ఇవ్వాలని నిర్ణయించారు.

సామాజిక చైతన్యానికి నాంది

విద్యతోనే మహిళా విముక్తి సాధ్యమని నమ్మిన సామాజిక సంస్కర్త సావిత్రిబాయి పూలే జయంతిని మహిళా ఉపాధ్యాయ దినోత్సవంగా జరపడం తెలంగాణ ప్రభుత్వం తీసుకున్న ప్రగతిశీలమైన నిర్ణయం.

మహిళా ఉపాధ్యాయుల అభినందన

ఈ ప్రకటనతో రాష్ట్రవ్యాప్తంగా మహిళా ఉపాధ్యాయులు హర్షం వ్యక్తం చేశారు. ఈరోజు తమకు గర్వకారణంగా నిలుస్తుందని వారు అభిప్రాయపడ్డారు.