డ్రగ్స్‌పై పోరాటంలో మతగురువుల ముందడుగు

 

నేటి యువతరం మద్యం, మాదకద్రవ్యాల మత్తులో జోగుతోంది. ఈ మత్తు పదార్థాలను నివారించాల్సిన బాధ్యత మతగురువులపై ఉందని, మాదకద్రవ్యాలకు వ్యతిరేకంగా మతగురువులంతా ముక్తకంఠంతో తీర్మానించారు. మత గురువులు తమ వంతు కర్తవ్యాన్ని నిర్వర్తించి యువతరాన్ని ఈ ముప్పు నుంచి కాపాడాలని పిలుపునిచ్చారు.

లకడీకాపూల్‌లోని హోటల్ అశోకా ప్రాంగణంలో ధార్మిక జనమోర్చా ఆధ్వర్యంలో జరిగిన "మాదక ద్రవ్యాల ముప్పును అరికట్టడంలో మతగురువుల పాత్ర" అనే రౌండ్ టేబుల్ సమావేశంలో ఈ అంశం ప్రాధాన్యమిచ్చారు. ధార్మిక జనమోర్చా నేషనల్ కన్వీనర్ డా. సలీమ్ ఇంజనీర్ అధ్యక్షతన జరిగిన ఈ సమావేశంలో వివిధ మతగురువులు, సామాజిక నాయకులు పాల్గొన్నారు.

సమావేశంలో ముఖ్యాంశాలు:

సలీమ్ ఇంజనీర్: "మాదకద్రవ్యాలను అరికట్టడంలో అన్ని మతాల గురువులు ఏకతాటిపైకి రావాలి. పిల్లలను చిన్ననాటి నుంచే నైతిక విలువలతో పెంచితే ఈ సమస్య తగ్గుముఖం పడుతుంది." చిలుకూరు పండితుడు లక్ష్మీ నరసింహులు: "భక్తి, నైతిక చింతన చిన్నప్పటినుంచి అలవడితే యువత మత్తుకు దూరంగా ఉంటారు."

జమాఅతె ఇస్లామీహింద్ నాయకురాలు డాక్టర్ అస్రా: "పిల్లలతో స్నేహపూర్వకంగా మెలగటం ద్వారా వారు వ్యసనాల బారిన పడకుండా కాపాడవచ్చు." లింగాయత్ మఠ్ ప్రతినిధి ప్రభుదేవ స్వామిజీ: "యువత మానసిక, శారీరక శక్తిని చైతన్యవంతం చేయడం మత పెద్దల బాధ్యత." 

చర్చి ఫాదర్ అనంతయ్య: "మత్తులో జోగడం మన ఆత్మను నాశనం చేయడమే. ఆటలు, విద్య ద్వారా పిల్లల జీవితాలను ఉత్తమంగా మార్చొచ్చు."

మాదకద్రవ్యాల ముప్పు స్కూళ్లకూ విస్తరణ

నార్కోటిక్ డీఎస్పీ సుబ్బిరామిరెడ్డి మాట్లాడుతూ, "మాదకద్రవ్యాల వాడకం కాలేజీలతోపాటు స్కూళ్లకు కూడా పాకింది. పిల్లలు గంజాయి చాక్లెట్లకు అలవాటు పడుతున్నారు. పేరెంట్స్ తమ పిల్లలపై నిఘా పెట్టి వారికి సరైన దారిని చూపాలని" పిలుపునిచ్చారు. ఈ సమావేశం మాదకద్రవ్యాల నిర్మూలనలో మతగురువుల పాత్రను స్పష్టంగా చెబుతూ, సామాజిక చైతన్యానికి దోహదపడింది.