పూర్వ విద్యార్థుల ఆత్మీయ సమ్మేళనం అనుభూతుల వెల్లివిరింపు

మెదక్ జిల్లా తూప్రాన్ మున్సిపల్ పరిధిలోని పోతురాజుపల్లి శ్రీ రాజరాజేశ్వరి హైస్కూల్ 2011-2012 బ్యాచ్ పదవ తరగతి విద్యార్థులు అంగరంగ వైభవంగా పూర్వ విద్యార్థుల (అపూర్వ) ఆత్మీయ సమ్మేళనాన్ని నిర్వహించారు. ఈ ఆనందోత్సవాన్ని తూప్రాన్ లోని ఒక ఫంక్షన్ హాల్ లో నిర్వహించి, తమ విద్యాబుద్ధులను తీర్చిదిద్దిన గురువులను ఘనంగా సత్కరించారు.

గురువులకు ఘనస్వాగతం

ఈ కార్యక్రమంలో ఉపాధ్యాయులు భూషణం చారి, శ్రీనివాస్, రాంప్రసాద్, సాగర్, రాజులను విద్యార్థులు పూలమాలలతో స్వాగతించి, వారి గురుత్వాన్ని గుర్తుచేసుకున్నారు. విద్యార్థులు తమ చిన్ననాటి స్మృతులను నెమరువేసుకుంటూ స్కూల్ డేస్ లో చేసిన చిలిపి పనులను తలచుకుంటూ ఎంతో ఆనందంగా గడిపారు.

గురువుల ప్రేరణ – విద్యార్థుల అభినందనలు

ఈ సందర్భంగా తెలుగు పండిట్ రాంప్రసాద్ విద్యార్థులకు ఆశీర్వచనాలు అందించారు. విద్యార్థులు తమ గురువులను మరచిపోకుండా వారిని సత్కరించడం అభినందనీయమని భూషణం చారి అన్నారు. విద్యార్థుల ఈ ప్రవర్తన వారి సంస్కారానికి నిదర్శనమని టీచర్ శ్రీనివాస్ ప్రశంసించారు. విద్యార్థులకు ప్రత్యేక అభినందనలు తెలియజేస్తూ, ఈ కార్యక్రమాన్ని విజయవంతంగా నిర్వహించినందుకు రాజు, సాగర్లు ప్రశంసలు అందించారు.

ఆత్మీయ సమావేశంలో పాల్గొన్న విద్యార్థులు

ఈ కార్యక్రమంలో సుస్మిత, మౌనిక, అనూష, నవీన్, నరేష్, చరణ్, దస్తగిరి, ఆబేద్, ప్రసాద్, ఆంజనేయులు, రుషి మాల, శిల్పా, ముజాహిద్ తదితర విద్యార్థులు ఉత్సాహంగా పాల్గొన్నారు.

ఈ సమ్మేళనం విద్యార్థుల అనుబంధాన్ని, గురువుల గౌరవాన్ని ప్రదర్శించడంతో పాటు, స్కూల్ డేస్ జ్ఞాపకాలతో ప్రతి ఒక్కరికీ మధురమైన అనుభూతిని మిగిల్చింది.