రాష్ట్రంలో పెరుగుతున్న విద్యుత్ డిమాండ్‌ – భవిష్యత్తు అవసరాలపై సీఎం రేవంత్ రెడ్డి సమీక్ష

తెలంగాణ రాష్ట్రంలో ఇంతకుముందెన్నడూ లేనంతగా విద్యుత్ డిమాండ్ పెరిగిన నేపథ్యంలో, భవిష్యత్తులో ఉండబోయే అవసరాలను దృష్టిలో ఉంచుకొని విద్యుత్ సరఫరాలో లోటులు లేకుండా చర్యలు తీసుకోవాలని ముఖ్యమంత్రి రేవంత్ రెడ్డి అధికారులను ఆదేశించారు. రాష్ట్రానికి వెల్లువెత్తుతున్న పెట్టుబడులు, పారిశ్రామిక అభివృద్ధి నేపథ్యంలో సమర్థవంతమైన విద్యుత్ ప్రణాళికను రూపొందించాలని సీఎం స్పష్టం చేశారు.

విద్యుత్ పరిస్థితులపై సమీక్ష

జూబ్లీహిల్స్‌లోని తన నివాసంలో ఉప ముఖ్యమంత్రి మల్లు భట్టివిక్రమార్కతో కలిసి ఇంధన శాఖ ఉన్నతాధికారులతో సీఎం సమీక్ష నిర్వహించారు. ఈ సందర్భంగా పరిశ్రమలు, గ్లోబల్ కెపాబిలిటీ సెంటర్లు (GCC), డేటా సెంటర్లు, మాస్ ట్రాన్స్‌పోర్టేషన్‌ (మెట్రో, ఎలక్ట్రిక్ వెహికల్స్) అవసరాలను దృష్టిలో ఉంచుకుని పునరుత్పాదక విద్యుత్‌పై ప్రత్యేక దృష్టి పెట్టాలని సూచించారు.

భవిష్యత్‌ అవసరాలకు తగ్గ విద్యుత్ ప్రణాళిక

మూడేండ్లలో విద్యుత్ డిమాండ్ భారీగా పెరగనున్న నేపథ్యంలో, ముందుగానే రోడ్‌మ్యాప్‌ సిద్ధం చేసుకోవాలని సీఎం అధికారులకు ఆదేశించారు. అభివృద్ధి పనులు, ప్రతిష్టాత్మక ప్రాజెక్టుల ప్రభావంతో విద్యుత్ అవసరాలు పెరగడం తథ్యమని, దానికి అనుగుణంగా విద్యుత్ సరఫరా యోచన చేయాల్సిన అవసరం ఉందని పేర్కొన్నారు.

డిమాండ్ పెరుగుదలపై గణాంకాలు

గత ఏడాదితో పోలిస్తే విద్యుత్ డిమాండ్‌ 9.8 శాతం పెరిగినట్లు నివేదికలు తెలిపాయి. ఈ సంవత్సరం 17,162 మెగావాట్ల విద్యుత్ డిమాండ్ నమోదవడం రికార్డు స్థాయిగా గుర్తించారు. ఈ డిమాండ్‌ 2025–26 నాటికి 18,138 మెగావాట్లు, 2034–35 నాటికి 31,808 మెగావాట్లకు పెరగనున్నట్లు అంచనా వేయబడింది.

క్లీన్ ఎనర్జీపై ప్రత్యేక దృష్టి

క్లీన్ ఎనర్జీ, పంప్డ్ స్టోరేజ్, ఫ్లోటింగ్ సోలార్ విద్యుత్ ఉత్పత్తి వంటి పునరుత్పాదక మార్గాల్లో అవకాశాలను మరింతగా వినియోగించుకోవాలని సూచించారు. ఇటీవల ప్రవేశపెట్టిన క్లీన్ అండ్ గ్రీన్ ఎనర్జీ పాలసీని అమలు పరచాలని, అంతర్జాతీయంగా పేరుగాంచిన విద్యుత్ ఉత్పత్తి సంస్థలకు రాష్ట్రంలో అవకాశాలు కల్పించాలని సీఎం సూచించారు.

ఇతర కీలక మార్గదర్శకాలు

• నీటిపారుదల ప్రాజెక్టులు, మెట్రో, రైలు లైన్లు, మాస్ ట్రాన్స్‌పోర్ట్ అవసరాలకు విద్యుత్ ప్రణాళిక సిద్ధం చేయాలి.
• హైదరాబాద్ నగరం జీసీసీ హబ్‌గా అభివృద్ధి చెందుతోందని, భవిష్యత్తులో డేటా సెంటర్ల హబ్‌గా మారబోతుందని తెలిపారు. డేటా సిటీ ఏర్పాటు చేయనున్నట్లు ప్రకటించారు.
• విద్యుత్ లైన్ల ఆధునీకరణ, సబ్‌స్టేషన్‌ల అప్‌గ్రేడ్‌ పనులపై దృష్టి పెట్టాలని సూచించారు.
• "ఫ్యూచర్ సిటీ" పరిధిలో భూగర్భ విద్యుత్ లైన్లను అమలు చేయాలని సూచించారు.
• స్మార్ట్ పోల్స్‌ను పాయిలట్ ప్రాజెక్టుగా ప్రయోగించేందుకు నగరంలోని కొన్ని కీలక ప్రాంతాలను ఎంపిక చేయాలని పేర్కొన్నారు.
• 160 కిలోమీటర్ల అవుటర్ రింగ్ రోడ్‌ పొడవునా సోలార్ విద్యుత్ వినియోగానికి ప్రణాళిక రూపొందించాలని తెలిపారు.
• జీహెచ్ఎంసీ పరిధిలో పుట్‌పాత్‌లు, నాలాలపై సోలార్ విద్యుత్ ఉత్పత్తి అవకాశాలను అధ్యయనం చేయాలన్నారు.

ఈ సమీక్ష సమావేశంలో తీసుకున్న నిర్ణయాలు తెలంగాణ రాష్ట్ర విద్యుత్ రంగానికి దిశానిర్దేశకంగా నిలిచే అవకాశం ఉంది. ముఖ్యమంత్రి సూచనలతో భవిష్యత్తులో విద్యుత్ అవసరాలను తీర్చడంలో రాష్ట్ర ప్రభుత్వం ముందుంటుందని స్పష్టమవుతోంది.