కొత్తగూడెంలో భార్య హత్య కేసు తీర్పు: భర్తకు జీవిత ఖైదు

కొత్తగూడెం లీగల్, భద్రాద్రి కొత్తగూడెం జిల్లా ప్రధాన న్యాయమూర్తి పాటిల్ వసంత్ గురువారం ఇచ్చిన తీర్పులో, దమ్మపేటలో చోటు చేసుకున్న దారుణ హత్యకేసులో నిందితుడు బత్తుల శ్రీనివాస్‌కు జీవిత ఖైదు శిక్ష విధించారు. కేసు వివరాలు ఇలా ఉన్నాయి...

దమ్మపేట మండలం గండుగులపల్లికి చెందిన వట్టి నాగేశ్వరరావు తన కుమార్తె వెంకటలక్ష్మిని (అలియాస్ సుధా) మంగపేట మండలం తిమ్మంపేటకు చెందిన బత్తుల శ్రీనివాస్‌కు వివాహం జరిపించారు. వివాహం తర్వాత మొదట్లో బాగుండగా, కొంతకాలానికే శ్రీనివాస్ తన అక్క కుక్కునూరి సావిత్రితో కలిసి కట్నానికి సంబంధించి వేధింపులు ప్రారంభించాడు. రెండు ఎకరాల భూమిని అమ్మి డబ్బులు తేవాలని భార్యపై ఒత్తిడి తెచ్చేవాడు. వేధింపులు తీవ్రతరం కావడంతో వెంకటలక్ష్మి పలు మార్లు తన తండ్రిని ఆశ్రయించింది.

2020 సెప్టెంబర్ 11న తెల్లవారుజామున, మణుగూరులోని తమ నివాసంలో శ్రీనివాస్ తన భార్యపై కత్తితో దాడి చేసి చంపేశాడు. తీవ్ర గాయాలతో ఆమె అక్కడికక్కడే మరణించింది. అప్పటి సర్కిల్ ఇన్స్పెక్టర్ ఎం.ఏ. షుకూర్ కేసు నమోదు చేయగా, అనంతరం సీఐ ఆర్. భానుప్రకాశ్ దర్యాప్తు చేపట్టి, శ్రీనివాస్‌తో పాటు అతని అక్క కుక్కునూరి సావిత్రిపై కోర్టులో చార్జ్‌షీట్ దాఖలు చేశారు.

కోర్టులో 13 మంది సాక్షుల వాంగ్మూలాల మేరకు, బత్తుల శ్రీనివాస్‌కు హత్య రుజువైంది. దీని ఆధారంగా న్యాయమూర్తి:

• భారత శిక్షాస్మృతి సెక్షన్ 302 ప్రకారం జీవిత ఖైదు మరియు ₹1000 జరిమానా
• సెక్షన్ 498A ప్రకారం మూడు సంవత్సరాల జైలు శిక్షతో పాటు ₹1000 జరిమానా

విధిస్తూ తీర్పు చెప్పారు. రెండు శిక్షలు ఏకకాలంలో అనుభవించాల్సి ఉంటుందని స్పష్టం చేశారు. కాగా, సాక్షాలు రుజువుకాకపోవడంతో కుక్కునూరి సావిత్రిని నిర్దోషిగా విడుదల చేశారు.

ఈ కేసులో పబ్లిక్ ప్రాసిక్యూటర్‌గా పివిడి లక్ష్మి వాదనలు వినిపించగా, కోర్టు నోడల్ ఆఫీసర్ జి. ప్రవీణ్ కుమార్, లైజన్ ఆఫీసర్ ఎన్. వీరబాబు, కోర్టు డ్యూటీ పీసీ అశోక్ తదితరులు సహకారం అందించారు.