స్త్రీశక్తి పథకానికి సర్వం సిద్ధం – ఆగస్టు 15 నుండి ఉచిత బస్సు ప్రయాణం

ఆంధ్రప్రదేశ్‌లో మహిళల సాధికారతకు మరొక అద్భుత అడుగు వేస్తూ ముఖ్యమంత్రి చంద్రబాబు నాయుడు ప్రభుత్వం ప్రతిష్టాత్మక “స్త్రీశక్తి” పథకాన్ని ప్రారంభించేందుకు సర్వం సిద్ధమైంది. రాష్ట్రవ్యాప్తంగా మహిళలు ఏపీఎస్ ఆర్టీసీ బస్సుల్లో ఉచితంగా ప్రయాణించేందుకు ఈ పథకం ఆగస్టు 15 నుంచి అమల్లోకి రానుంది.

ముఖ్యమంత్రి చంద్రబాబు నాయుడు మంగళవారం సమీక్షా సమావేశం నిర్వహించి, పథకం అమలులో ఎలాంటి అంతరాయం లేకుండా అన్ని జిల్లాల్లో ఏర్పాట్లు పూర్తిచేయాలని అధికారులను ఆదేశించారు.

ఏ బస్సుల్లో ఉచితం?

స్త్రీశక్తి పథకంలో పల్లె వెలుగు, అల్ట్రా పల్లె వెలుగు, సిటీ ఆర్డినరీ, మెట్రో, ఎక్స్‌ప్రెస్‌ బస్సుల్లో రాష్ట్రంలోని ఎక్కడి నుంచి ఎక్కడికైనా మహిళలు ఉచితంగా ప్రయాణించవచ్చు.

ఆర్టీసీ సన్నాహాలు

ఏపీఎస్‌ఆర్టీసీ చైర్మన్ కొనకళ్ల నారాయణ మాట్లాడుతూ, మొత్తం 11,500 బస్సుల్లో 8,459 బస్సులను ఈ పథకానికి కేటాయించామని తెలిపారు. అవసరానికి అనుగుణంగా అదనపు సిబ్బందిని కూడా సమకూరుస్తున్నామని పేర్కొన్నారు.

గుర్తింపు కార్డు తప్పనిసరి

ప్రయాణ సమయంలో ఆధార్ కార్డు, ఓటర్ ఐడి, రేషన్ కార్డు లేదా పాన్ కార్డు వంటి గుర్తింపు కార్డుల్లో ఏదో ఒకటి చూపాల్సి ఉంటుంది. మహిళలకు జీరో ఫేర్ టికెట్ జారీచేయనున్నారు.

బడ్జెట్ & కొత్త బస్సులు

పథకం అమలు కోసం ప్రభుత్వం ఏడాదికి రూ.1,950 కోట్లు కేటాయించింది. ఇప్పటికే 700 ఎలక్ట్రిక్ బస్సులు కొనుగోలు చేయగా, రాబోయే రెండేళ్లలో మరో 1,400 బస్సులను కొనుగోలు చేయాలని నిర్ణయించింది.

విద్యార్థినులకూ లాభం

చదువుతున్న మహిళా విద్యార్థినులకు కూడా ఈ పథకం వర్తిస్తుంది. దీంతో విద్య, ఉద్యోగం, వ్యక్తిగత అవసరాల కోసం రాష్ట్రవ్యాప్తంగా మహిళల ప్రయాణం మరింత సులభం కానుంది.