79వ స్వాతంత్ర దినోత్సవ వేడుకలు గాంధీ భవన్‌లో ఘనంగా

హైదరాబాద్‌: 79వ స్వాతంత్ర దినోత్సవాన్ని పురస్కరించుకొని గాంధీ భవన్ ప్రాంగణంలో ఘనంగా వేడుకలు నిర్వహించారు. టీపీసీసీ అధ్యక్షులు మహేష్ కుమార్ గౌడ్ జాతీయ జెండాను ఎగురవేశారు. జెండా ఎగురవేసిన అనంతరం జాతీయ గీతం ఆలపించగా, స్వాతంత్ర్య సమరయోధుల త్యాగాలను స్మరించుకుంటూ సభ జరిగింది.

ఈ కార్యక్రమంలో టీపీసీసీ వర్కింగ్ ప్రెసిడెంట్ జగ్గారెడ్డి, ఏఐసీసీ కార్యదర్శి సంపత్ కుమార్, సీనియర్ నేత మాజీ ఎంపీ వి. హనుమంతరావు, పీసీసీ సలహా కమిటీ సభ్యులు కుసుమ కుమార్, సేవాదళ్ చైర్మన్ జితేందర్, కార్పొరేషన్ చైర్మన్లు మరియు పలు పార్టీ నేతలు పాల్గొన్నారు.

మహేష్ కుమార్ గౌడ్ మాట్లాడుతూ, “స్వాతంత్ర్యం కోసం ప్రాణత్యాగం చేసిన మహానుభావుల కలల సాకారానికి కృషి చేయడం ప్రతి పౌరుడి బాధ్యత” అని తెలిపారు. దేశంలో ప్రజాస్వామ్యం, రాజ్యాంగ విలువలు, సెక్యులరిజం కాపాడేందుకు కాంగ్రెస్‌ పార్టీ ఎల్లప్పుడూ అగ్రగామిగా ఉంటుందని ఆయన స్పష్టం చేశారు.

జగ్గారెడ్డి మాట్లాడుతూ, యువత స్వాతంత్ర సమరయోధుల త్యాగాలను ఆదర్శంగా తీసుకుని దేశ నిర్మాణంలో భాగస్వామ్యం కావాలని పిలుపునిచ్చారు. సంపత్ కుమార్, హనుమంతరావు, కుసుమ కుమార్ తదితరులు కూడా స్వాతంత్రం ప్రాముఖ్యతపై ప్రసంగించారు.

అనంతరం పాల్గొన్న వారికి మిఠాయిలు పంచి, స్వాతంత్ర దినోత్సవ శుభాకాంక్షలు తెలిపారు. గాంధీ భవన్ మొత్తం జాతీయ జెండాలతో, పూలతో అలంకరించబడగా, దేశభక్తి గీతాలు వినిపించి వాతావరణాన్ని మరింత ఉత్సాహభరితంగా మార్చాయి.