రేబీస్ భయంతో దారుణం – మూడేళ్ల పాపను చంపి తల్లి ఉరివేసుకుని ఆత్మహత్య

మహబూబ్ నగర్, జిల్లా కేంద్రంలో మానవత్వం తలదించుకునే ఘటన చోటు చేసుకుంది. రేబీస్ సోకిందనే అనుమానంతో మూడేళ్ల పాపను హతమార్చి తల్లి ఉరివేసుకుని ఆత్మహత్య చేసుకున్న సంఘటన స్థానికులను షాక్‌కు గురిచేసింది.

వివరాల్లోకి వెళ్తే…

యశోద (36) అనే మహిళ భర్తతో కలిసి మహబూబ్ నగర్‌లో నివసిస్తోంది. వారికి ముగ్గురు పిల్లలు. చిన్న కూతురు (3) ఇటీవల కుక్కలు ఎంగిలిచేసిన పల్లీలు తిన్నట్లు తెలిసి, ఆ విషయం యశోదను తీవ్ర ఆందోళనకు గురి చేసింది. పాపకు రేబీస్ సోకిందేమోననే అనుమానం ఆమెను వదల్లేదు.

టీకాలు వేసినా భయమే…

పాపకు అవసరమైన రేబీస్ టీకాలు వేసినా కూడా యశోద భయం తగ్గలేదు. రోజురోజుకు అనుమానం పెరిగిపోవడంతో మానసిక ఆందోళనకు గురయ్యింది. కుటుంబ సభ్యుల సమక్షంలోనూ ఆమె అస్వస్థత కనిపించేది.

దారుణం…

ఆ మానసిక వేదన తట్టుకోలేక యశోద సోమవారం ఉదయం పాపను ఊపిరాడనీయకుండా చంపేసి, అనంతరం తానూ ఉరేసుకుని ఆత్మహత్యకు పాల్పడింది. ఈ ఘటనతో స్థానికులు కన్నీటి పర్యంతమవుతున్నారు.

భర్త వేదన

“టీకాలు వేయించాం… కానీ ఆమె భయం పోలేదు. మతిభ్రమకు గురై ఇలా దారుణానికి పాల్పడింది” అని యశోద భర్త వేదన వ్యక్తం చేశాడు.

వైద్యుల హెచ్చరిక

రేబీస్ అనుమానం వచ్చినప్పుడు వెంటనే అంటీ రేబీస్ టీకా వేయించుకుంటే వ్యాధి సోకే అవకాశం ఉండదని వైద్యులు చెబుతున్నారు. అపోహలు, అనవసర భయాలు ప్రమాదకర పరిణామాలకు దారి తీస్తాయని హెచ్చరిస్తున్నారు.