టీటీడీ టికెట్లు వాట్సాప్‌లో చిటికెలో బుక్ చేసుకోండి!
తిరుపతి, అక్టోబర్ 11: భక్తుల సౌకర్యార్థం ఆంధ్రప్రదేశ్ ప్రభుత్వం చేపట్టిన వాట్సాప్ గవర్నెన్స్ సేవలు మరింత విస్తరించాయి. ఇప్పటికే పలు ప్రభుత్వ సేవలను అందిస్తున్న ఈ వేదికలో ఇప్పుడు తిరుమల తిరుపతి దేవస్థానం (టీటీడీ) సేవలు కూడా చేర్చబడ్డాయి. ఇకపై భక్తులు టీటీడీకి సంబంధించిన వివిధ సేవలను వాట్సాప్ ద్వారా నేరుగా పొందవచ్చు.
టీటీడీకి సంబంధించి ప్రస్తుతం నాలుగు ముఖ్య సేవలను ఈ వాట్సాప్ గవర్నెన్స్‌లో అందుబాటులోకి తెచ్చారు. ఇందులో స్లాటెడ్ సర్వదర్శన టోకెన్ సెంటర్ల సమాచారం, అందుబాటులో ఉన్న టికెట్ల సంఖ్య, దర్శనానికి పట్టే సమయం, శ్రీవాణి టికెట్ల వివరాలు, అలాగే గదుల డిపాజిట్ రీఫండ్ స్థితి వంటి అంశాలు ఉన్నాయి.
టికెట్లు బుక్ చేసుకునే విధానం:
- ముందుగా 95523 00009 అనే వాట్సాప్ నంబర్‌ను మీ మొబైల్‌లో సేవ్ చేసుకోండి.
- వాట్సాప్ ఓపెన్ చేసి ఆ నంబర్‌కు “హాయ్ (Hi)” అని మెసేజ్ పంపండి.
- చాట్‌బాట్‌ నుంచి వచ్చే మెను ఆప్షన్లలో మీకు కావాల్సిన సేవను ఎంచుకోండి.
- అందులో “ఆలయ బుకింగ్ సేవలు” (Temple Booking Services) అనే ఆప్షన్‌ను ఎంచుకోండి.
- దర్శన టికెట్లు, సేవా రిజర్వేషన్లు, వసతి, ఇతర సేవల కోసం చాట్‌బాట్‌ సూచనలు ఇస్తుంది.
- స్లాటెడ్ సర్వదర్శనం, సర్వ దర్శనం, శ్రీవాణి కౌంటర్ స్టేటస్, డిపాజిట్ రీఫండ్ లైవ్ స్టేటస్ వంటి ఆప్షన్లు కూడా అందుబాటులో ఉంటాయి.
- మీరు ఎంచుకున్న సేవకు సంబంధించిన బుకింగ్ వివరాలు వాట్సాప్‌లోనే వస్తాయి.
- చివరగా, టికెట్‌ను డౌన్‌లోడ్ చేసి ప్రింట్ తీసుకోవచ్చు.
ఈ సౌకర్యంతో భక్తులు ఇకపై వెబ్‌సైట్‌ లేదా కౌంటర్‌ల వద్ద ఎక్కువ సమయం ఖర్చు చేయకుండా, చిటికెలోనే తమ దర్శన, వసతి బుకింగ్‌లను పూర్తి చేసుకోవచ్చు.
Post a Comment