ఎవరెస్టుపై మంచు తుపాను.. చిక్కుకున్న వెయ్యి మంది పర్యాటకులు

 

ఎవరెస్టు పర్వతంపై ఘోరమైన మంచు తుపాను విజృంభించింది. ఈ అనుకోని తుపానుతో సుమారు 1000 మంది పర్యాటకులు చిక్కుకుపోయినట్లు సమాచారం. పర్వతం తూర్పు వైపు ఉన్న క్యాంప్‌సైట్ల వద్ద వీరు ఆగి ఉండగా తుపాను సంభవించిందని అధికారులు తెలిపారు.

రక్షణ చర్యలు వేగంగా కొనసాగుతున్నాయని, ఇప్పటివరకు 350 మందిని సురక్షిత ప్రాంతాలకు తరలించారని సమాచారం. మిగిలిన వారిని బయటకు తీయడానికి హెలికాప్టర్ల సాయంతో ప్రయత్నాలు కొనసాగుతున్నాయి.

చైనాలో సెలవులు ఉండటంతో ఈ ప్రాంతానికి భారీ సంఖ్యలో పర్యాటకులు చేరుకున్నారని అధికారులు చెప్పారు. కర్మ వ్యాలీని సందర్శించేందుకు వచ్చిన వారిలో ఎక్కువమంది చైనా పౌరులే ఉన్నట్లు తెలుస్తోంది.

ఇక, అక్కడి వాతావరణ పరిస్థితులు అత్యంత కఠినంగా మారడంతో హైపోథెర్మియా బారిన పడే ప్రమాదం ఉందని ట్రెక్కింగ్ టీమ్ సభ్యులు హెచ్చరిస్తున్నారు. తుపాను అకస్మాత్తుగా సంభవించిందని, ఎవరూ ముందుగానే ఊహించలేకపోయారని మరో సభ్యుడు పేర్కొన్నారు.

ప్రస్తుతం ఎవరెస్టు ప్రాంతంలో వాతావరణం తీవ్రంగా చల్లగా ఉండటంతో రక్షణ చర్యలకు అడ్డంకులు ఎదురవుతున్నాయి. అయితే, అధికారులు అందరికీ సహాయం అందించే వరకు ఆగమని ప్రకటించారు.