జనజీవన స్రవంతిలోకి మరో 26 మంది మావోయిస్టులు

హైదరాబాద్, జనవరి 07: ఛత్తీస్‌గఢ్ రాష్ట్రం సూక్మా జిల్లాలో మావోయిస్టు ఉద్యమానికి మరోసారి గట్టి ఎదురుదెబ్బ తగిలింది. మావోయిస్టుల కోటగా పేరుగాంచిన బస్తర్ రీజియన్‌లో బుధవారం 26 మంది మావోయిస్టులు ఆయుధాలు వీడి జనజీవన స్రవంతిలోకి వచ్చారు. జిల్లా ఎస్పీ కిరణ్ చవాన్ ఎదుట వీరంతా స్వచ్ఛందంగా లొంగిపోయారు.

ప్రభుత్వం చేపట్టిన “పూన నర్కోమ్ – కొత్త ఉదయం” ప్రచార కార్యక్రమానికి ఆకర్షితులై మావోయిస్టులు ఈ నిర్ణయం తీసుకున్నట్లు అధికారులు వెల్లడించారు. అభివృద్ధి అవకాశాలు, శాంతియుత జీవనంపై విశ్వాసం పెరగడంతోనే ఆయుధ పోరాటానికి స్వస్తి పలికినట్లు తెలిపారు.

కీలక నేతల లొంగుబాటు – రూ.64 లక్షల రివార్డు

లొంగిపోయిన 26 మందిలో మావోయిస్టు పార్టీలో కీలక బాధ్యతలు నిర్వహించిన నేతలు కూడా ఉన్నారు. వీరిపై గతంలో ప్రభుత్వం మొత్తం రూ.64 లక్షల రివార్డు ప్రకటించినట్లు పోలీసు అధికారులు తెలిపారు. వీరంతా మావోయిస్టు పార్టీకి చెందిన మార్వార్ డివిజన్తో పాటు పీపుల్స్ లిబరేషన్ గెరిల్లా ఆర్మీ (PLGA) కమిటీ సభ్యులుగా గుర్తించబడ్డారు.

పోలీసు–సిఆర్పిఎఫ్ సమక్షంలో లొంగుబాటు

ఛత్తీస్‌గఢ్ పోలీసు యంత్రాంగం, సిఆర్పిఎఫ్ ఉన్నతాధికారుల సమక్షంలో లొంగుబాటు ప్రక్రియ అధికారికంగా పూర్తైంది. మావోయిస్టు భావజాలంపై విరక్తి చెంది, అభివృద్ధి వైపు అడుగులు వేయాలన్న సంకల్పంతోనే వీరంతా లొంగిపోయినట్లు ఎస్పీ కిరణ్ చవాన్ తెలిపారు.

పునరావాసం, సహాయం అందిస్తాం

లొంగిపోయిన వారికి ప్రభుత్వ నిబంధనల ప్రకారం తక్షణ ఆర్థిక సహాయం, పునరావాసం, ఉపాధి అవకాశాలు కల్పిస్తామని అధికారులు హామీ ఇచ్చారు. సమాజంలో గౌరవప్రదమైన జీవితం గడిపేలా అన్ని విధాలుగా తోడ్పాటు అందిస్తామని స్పష్టం చేశారు.

ఎన్‌కౌంటర్లు, ఏరివేతల ప్రభావం

ఇటీవలి కాలంలో ఛత్తీస్‌గఢ్‌లో మావోయిస్టుల ఏరివేత చర్యలు వేగవంతం కావడం, వరుసగా కీలక ఎన్‌కౌంటర్లు జరగడం వల్ల దళ సభ్యుల్లో అభద్రతాభావం పెరిగింది. దీనితో పాటు ప్రభుత్వ అభివృద్ధి కార్యక్రమాలు, లొంగుబాటు విధానాలు ఫలితమిస్తూ మావోయిస్టుల లొంగుబాట్లు కొనసాగుతున్నాయి.