రాష్ట్ర ప్రజలకు సీఎం రేవంత్ రెడ్డి కృతజ్ఞతలు మున్సిపల్ ఎన్నికల్లో కాంగ్రెస్ ఘన విజయం

రాష్ట్రవ్యాప్తంగా 116 మున్సిపాలిటీలు, 7 మున్సిపల్ కార్పొరేషన్ల పరిధిలో జరిగిన ఎన్నికల్లో కాంగ్రెస్ పార్టీకి లభించిన అఖండ విజయంపై ముఖ్యమంత్రి A. Revanth Reddy హర్షం వ్యక్తం చేశారు. అత్యధిక స్థానాల్లో కాంగ్రెస్ అభ్యర్థులను గెలిపించిన రాష్ట్ర ప్రజలకు ఆయన హృదయపూర్వక ధన్యవాదాలు తెలిపారు.

ఈ సందర్భంగా విడుదల చేసిన ప్రకటనలో సీఎం మాట్లాడుతూ, ఈ విజయం లక్షలాది కాంగ్రెస్ కార్యకర్తల కృషి ఫలితమని పేర్కొన్నారు. పార్టీ పట్ల ఉన్న అపారమైన నిబద్ధతతో గ్రామాలు, పట్టణాల్లో పార్టీ జెండాను మోసి ప్రభుత్వ పథకాలను ప్రజల్లోకి తీసుకెళ్లిన ప్రతి కార్యకర్తకు ఈ విజయాన్ని అంకితం చేస్తున్నామని తెలిపారు.

రాష్ట్రంలో రెండేళ్లుగా అమలవుతున్న ప్రజాపాలన, పేద–మధ్యతరగతి వర్గాల సంక్షేమ కార్యక్రమాలు, పారదర్శక విధానాలు, అభివృద్ధి ప్రణాళికలకు ప్రజలు ఈ ఎన్నికల తీర్పు ద్వారా మద్దతు తెలిపారని సీఎం స్పష్టం చేశారు. ప్రజా ప్రభుత్వం తీసుకున్న నిర్ణయాలు ప్రజల విశ్వాసాన్ని మరింత బలపరిచాయని పేర్కొన్నారు.

ఈ విజయం తమ బాధ్యతను మరింత పెంచిందని పేర్కొన్న ముఖ్యమంత్రి, రాష్ట్ర అభివృద్ధి, ప్రజల సంక్షేమం, పారదర్శక పాలనకు మరింత కట్టుబడి పనిచేస్తామని హామీ ఇచ్చారు. ప్రతి మున్సిపాలిటీ, ప్రతి మున్సిపల్ కార్పొరేషన్‌ను సమగ్రంగా అభివృద్ధి చేసి ప్రజల నమ్మకాన్ని నిలబెట్టుకుంటామని తెలిపారు.