ఉద్యోగుల ఖాతాల్లోకి డిఏ బకాయిలు: మంత్రి భట్టి విక్రమార్క

హైదరాబాద్, మార్చి 23: తెలంగాణ రాష్ట్ర ప్రభుత్వ ఉద్యోగులకు శుభవార్త అందింది. డిఏ బకాయిలను త్వరలోనే ఉద్యోగుల ఖాతాల్లో జమ చేస్తామని ఉప ముఖ్యమంత్రి భట్టి విక్రమార్క అసెంబ్లీలో ప్రకటించారు. ఉద్యోగుల సంక్షేమం తమ ప్రభుత్వానికి అత్యంత ప్రాధాన్యతగా ఉందని ఆయన స్పష్టం చేశారు.

అసెంబ్లీలో మాట్లాడిన భట్టి విక్రమార్క, గత ప్రభుత్వ ఆర్థిక నిర్వహణపై విమర్శలు గుప్పించారు. గత ప్రభుత్వం సుమారు ₹40,150 కోట్ల బకాయిలు మిగిల్చిందని, అందులో ఉద్యోగుల పెండింగ్ బిల్లులు ₹4,575 కోట్ల వరకు ఉన్నాయని తెలిపారు. అయితే తమ ప్రభుత్వం అధికారంలోకి వచ్చిన తర్వాత ఇప్పటికే ₹6,146 కోట్ల బకాయిలను క్లియర్ చేసినట్లు చెప్పారు.

కీలక ప్రకటనలు:

• ఉద్యోగుల జీతాలను ప్రతి నెల 1వ తేదీన ఖాతాల్లో జమ చేస్తున్నామని వెల్లడించారు.
• పెండింగ్ బిల్లుల చెల్లింపుల కోసం ప్రస్తుతం ప్రతి నెల ₹700 కోట్లు విడుదల చేస్తున్నామని, త్వరలో దీన్ని ₹1,000 కోట్లకు పెంచే యోచనలో ఉన్నట్లు తెలిపారు.
• పదేళ్లుగా పెండింగ్‌లో ఉన్న హెల్త్ కార్డుల సమస్యను పరిష్కరించేందుకు చర్యలు చేపట్టామని, త్వరలో క్యాష్‌లెస్ వైద్య సేవలు అందించే హెల్త్ కార్డులు అందుబాటులోకి తీసుకురానున్నట్లు చెప్పారు.
• ఉద్యోగి ప్రమాదవశాత్తు మరణిస్తే కుటుంబానికి ₹1.25 కోట్ల బీమా సౌకర్యం కల్పించనున్నట్లు ప్రకటించారు.

డిఏలు, పీఆర్సీపై హామీ:

పెండింగ్‌లో ఉన్న నాలుగు డిఏలపై సానుకూల నిర్ణయం తీసుకుంటామని, కొత్త పీఆర్సీ నివేదిక వచ్చిన వెంటనే అమలుపై నిర్ణయం తీసుకుంటామని భట్టి హామీ ఇచ్చారు.

గత ప్రభుత్వంపై విమర్శలు:

రిటైర్మెంట్ బెనిఫిట్స్ ఇవ్వలేకపోవడంతోనే గత ప్రభుత్వం ఉద్యోగుల పదవీ విరమణ వయస్సును పెంచిందని ఆయన విమర్శించారు. ఈ నిర్ణయం కారణంగా సుమారు 17 వేల మంది ఉద్యోగుల రిటైర్మెంట్ భారం ప్రస్తుత ప్రభుత్వంపై పడిందని తెలిపారు.

అదేవిధంగా, గతంలో ఉద్యోగ సంఘాలపై పరిమితులు ఉండేవని, ఇప్పుడు సీఎం, డిప్యూటీ సీఎంలను ఉద్యోగులు స్వేచ్ఛగా కలిసే అవకాశం కల్పించామని ఆయన చెప్పారు.