మందుబాబులకు బిగ్ షాక్.. తెలంగాణలో పెరగనున్న మద్యం, బీర్ల ధరలు

తెలంగాణ ప్రభుత్వం రాష్ట్రంలోని మద్యం ప్రియులకు భారీ షాక్ ఇవ్వడానికి సిద్ధమవుతున్నట్లు సమాచారం. రాష్ట్రంలో మద్యం, బీర్ల ధరలను పెంచేందుకు ప్రభుత్వం గ్రీన్ సిగ్నల్ ఇచ్చినట్లు తెలుస్తోంది. ఇందుకు సంబంధించిన కసరత్తు దాదాపు పూర్తవగా, కొత్త ధరలను జూన్ 2 తర్వాత అమల్లోకి తీసుకురావచ్చని అధికార వర్గాల్లో చర్చ జరుగుతోంది.

పశ్చిమాసియాలో నెలకొన్న ఉద్రిక్తతల ప్రభావంతో అంతర్జాతీయంగా ఇంధన ధరలు పెరిగాయి. దీంతో లిక్కర్ తయారీలో ఉపయోగించే ఎల్పీజీ సహజ వాయువు కొరత ఏర్పడింది. గ్లాస్ బాటిళ్లు, రవాణా ఖర్చులు, ప్యాకింగ్ మెటీరియల్స్ ధరలు కూడా భారీగా పెరగడంతో తాము తీవ్ర నష్టాలను ఎదుర్కొంటున్నామని డిస్టిలరీలు, బ్రేవరీస్ కంపెనీలు ప్రభుత్వానికి పలుమార్లు విజ్ఞప్తి చేసినట్లు సమాచారం.

ఇక రాష్ట్రంలో సంక్షేమ, అభివృద్ధి పథకాల ఖర్చులు పెరుగుతున్న నేపథ్యంలో అదనపు ఆదాయ వనరుల కోసం ప్రభుత్వం మద్యం ధరల పెంపు వైపు మొగ్గు చూపినట్లు తెలుస్తోంది.

శ్లాబ్ విధానంలో ధరల పెంపు

ప్రభుత్వం నియమించిన త్రిసభ్య ధరల నిర్ధారణ కమిటీ ఇప్పటికే నివేదికను సమర్పించినట్లు సమాచారం. ప్రజల నుంచి తీవ్ర వ్యతిరేకత రాకుండా, అదే సమయంలో కంపెనీలకు నష్టం లేకుండా శ్లాబ్ సిస్టమ్ ద్వారా ధరలను 10 శాతం నుంచి 30 శాతం వరకు పెంచాలని ప్రతిపాదించినట్లు తెలుస్తోంది.

• సాధారణ బ్రాండ్ల ఫుల్ బాటిల్‌పై రూ.60 వరకు పెంపు
• ప్రీమియం బ్రాండ్లపై రూ.100 వరకు పెంపు
• హైఎండ్ బ్రాండ్లపై రూ.120 వరకు పెంపు అవకాశం

అలాగే ఎండల తీవ్రత, Indian Premier League సీజన్ ప్రభావంతో బీర్ల అమ్మకాలు రికార్డు స్థాయికి చేరడంతో, బీర్ల ధరలను కూడా 12% నుంచి 15% వరకు పెంచే అవకాశాలు ఉన్నాయని తెలుస్తోంది.

ప్రభుత్వ ఖజానాకు భారీ ఆదాయం

ఈ ధరల పెంపు ద్వారా రాష్ట్ర ప్రభుత్వానికి నెలకు కనీసం రూ.150 కోట్ల నుంచి రూ.250 కోట్ల వరకు అదనపు ఆదాయం వచ్చే అవకాశం ఉందని ఎక్సైజ్ శాఖ అధికారులు అంచనా వేస్తున్నారు. దీని ద్వారా ఏడాదికి దాదాపు రూ.3,000 కోట్ల వరకు అదనపు ఆదాయం సమకూరే అవకాశముందని సమాచారం.