బక్రీద్ పండగ శాంతియుతంగా నిర్వహించాలి అన్ని మతాల పెద్దలతో మణుగూరులో శాంతి కమిటీ సమావేశం

 

భద్రాద్రి కొత్తగూడెం జిల్లా మణుగూరు సబ్ డివిజన్ పరిధిలో బక్రీద్ పండగ సందర్భంగా ఎలాంటి అవాంఛనీయ సంఘటనలు చోటుచేసుకోకుండా ముందస్తు చర్యలలో భాగంగా శాంతి కమిటీ సమావేశాన్ని నిర్వహించారు. ఈ సమావేశానికి వివిధ మతాలకు చెందిన పెద్దలు, ప్రజాప్రతినిధులు, వ్యాపారవేత్తలు, యువజన సంఘాల ప్రతినిధులు, పోలీసు అధికారులు హాజరయ్యారు.

ఈ సందర్భంగా డీఎస్పీ రవీందర్ రెడ్డి మాట్లాడుతూ బక్రీద్ పండుగను ప్రతి ఒక్కరూ పరస్పర గౌరవభావంతో, సోదరభావంతో జరుపుకోవాలని సూచించారు. పండుగ సమయంలో శాంతి భద్రతలకు విఘాతం కలిగించే విధంగా ఎవరూ ప్రవర్తించరాదని హెచ్చరించారు. సామాజిక మాధ్యమాల్లో వచ్చే అసత్య ప్రచారాలు, రెచ్చగొట్టే పోస్టులు, వదంతులను నమ్మకుండా వెంటనే పోలీసులకు సమాచారం అందించాలని కోరారు.

ప్రజలు చట్టాలను గౌరవిస్తూ పోలీసు శాఖకు సహకరించాలని, పండుగ సందర్భంగా ఊరేగింపులు, ప్రార్థనలు, ప్రత్యేక కార్యక్రమాలు నిర్వహించే సమయంలో ముందస్తుగా అనుమతులు తీసుకోవాలని సూచించారు. మత సామరస్యాన్ని కాపాడటం ప్రతి ఒక్కరి బాధ్యత అని తెలిపారు.

పండుగ వేళల్లో పోలీసు శాఖ ప్రత్యేక బందోబస్తు ఏర్పాటు చేస్తోందని, ముఖ్య ప్రాంతాల్లో గస్తీ పెంచడంతో పాటు సీసీ కెమెరాల ద్వారా నిరంతర నిఘా కొనసాగుతుందని డీఎస్పీ తెలిపారు. ఎలాంటి అనుమానాస్పద వ్యక్తులు లేదా ఘటనలు కనిపించిన వెంటనే సమీప పోలీస్ స్టేషన్‌కు సమాచారం ఇవ్వాలని ప్రజలను కోరారు.

సమావేశంలో పాల్గొన్న మత పెద్దలు కూడా శాంతి భద్రతల పరిరక్షణకు పూర్తిస్థాయిలో సహకరిస్తామని హామీ ఇచ్చారు. బక్రీద్ పండుగను శాంతియుత వాతావరణంలో జరుపుకునేందుకు ప్రతి ఒక్కరూ బాధ్యతాయుతంగా వ్యవహరించాలని పిలుపునిచ్చారు.