గచ్చిబౌలి హిల్‌రిడ్జ్ విల్లాస్ భారీ చోరీ కేసు ఛేదించిన పోలీసులు నలుగురు అరెస్ట్

గచ్చిబౌలి హిల్‌రిడ్జ్ విల్లాస్ భారీ చోరీ కేసు ఛేదించిన పోలీసులు నలుగురు అరెస్ట్

హైదరాబాద్ గచ్చిబౌలిలోని హిల్‌రిడ్జ్ విల్లాస్‌లో జరిగిన భారీ చోరీ కేసును పోలీసులు ఛేదించారు. ఈ కేసులో నలుగురు నిందితులను అరెస్ట్ చేసి, వారి వద్ద నుంచి 7.837 కిలోల బంగారు ఆభరణాలు, 1.367 కిలోల వెండి వస్తువులు, నగదు స్వాధీనం చేసుకున్నారు. ఈ వివరాలను సైబరాబాద్ పోలీస్ కమిషనర్ డాక్టర్ రమేష్ వెల్లడించారు.

ఎలా జరిగింది?

నేపాల్‌కు చెందిన కమల్ షాహీ, విమల్ షాహీ దంపతులు హిల్‌రిడ్జ్ విల్లా నంబర్ 73లో నివసించే ప్రకాశ్ పాయ్ ఇంట్లో వాచ్‌మన్, సర్వెంట్లుగా పనిచేస్తున్నారు. ఈ నెల 6న ప్రకాశ్ పాయ్ కుటుంబం ముంబై వెళ్లిన కొద్దిసేపటికే సహ నిందితుడు సురేష్ షాహీ కిటికీ లాక్ పగులగొట్టి ఇంట్లోకి ప్రవేశించాడు.

బెడ్‌రూమ్‌లోని లాకర్‌పై ఉన్న కలశం చెంబులో దాచిన తాళం చెవిని ఉపయోగించి లాకర్ తెరిచి బంగారు ఆభరణాలను బయటకు తీశాడు. ఆ నగలను కమల్, విమల్ వద్ద ఉంచాడు. అనంతరం కమల్, విమల్ తమ బంధువు కల్పన షాహీతో కలిసి సికింద్రాబాద్ నుంచి రైలులో పరారయ్యారు. మరుసటి రోజు సురేష్ కూడా అక్కడి నుంచి తప్పించుకున్నాడు.

ఫోన్ నంబర్‌తో దొరికిన క్లూ

ప్రకాశ్ పాయ్ ఇంటికి తిరిగి వచ్చాక లాకర్‌లోని ఆభరణాలు చోరీకి గురైనట్లు గుర్తించి పోలీసులకు ఫిర్యాదు చేశారు. ఆరు ప్రత్యేక బృందాలు దర్యాప్తు ప్రారంభించాయి.

నిందితులు ఎన్‌బీటీ నగర్‌కు ఆటోలో వెళ్లినట్లు గుర్తించిన పోలీసులు అక్కడ దొరికిన కొత్త సిమ్ కార్డు కవర్‌పై ఉన్న ఫోన్ నంబర్ ఆధారంగా వారి జాడను కనుగొన్నారు. ఆ ఫోన్ నంబర్ ద్వారా నిందితులు ఉత్తరప్రదేశ్‌లోని ఉదంపూర్ ప్రాంతంలో ఉన్నట్లు గుర్తించారు.

నలుగురు అరెస్ట్.. ప్రధాన నిందితుడు పరారీ

బిహార్, ఉత్తరప్రదేశ్, ఉత్తరాఖండ్ రాష్ట్రాల పోలీసులు, ఎస్‌టీఎఫ్ సహకారంతో కమల్ షాహీ, విమల్ షాహీ, కల్పన షాహీతో పాటు వారిని ఉద్యోగంలో చేర్పించిన బిశ్వకర్మను అరెస్ట్ చేశారు.

అయితే ఈ కేసులో ప్రధాన సూత్రధారి అయిన సురేష్ షాహీ ప్రస్తుతం పరారీలో ఉన్నట్లు పోలీసులు తెలిపారు.

పోలీసులు చెప్పిన జాగ్రత్తలు

• లాకర్ తాళాలు ఇంట్లో బహిరంగ ప్రదేశాల్లో ఉంచకూడదు.
• ఇంటి పనివారు, వాచ్‌మన్ల పూర్తి వివరాలను పోలీస్ వెరిఫికేషన్ చేయించుకోవాలి.
• సీసీ కెమెరాలు, భద్రతా వ్యవస్థలను ఏర్పాటు చేసుకోవాలి.
• దీర్ఘకాలం బయటకు వెళ్లే ముందు విలువైన వస్తువుల భద్రతపై ప్రత్యేక శ్రద్ధ తీసుకోవాలి.

ఈ ఘటనలో లాకర్ తాళం చెవిని ఇంట్లోనే సులభంగా కనిపించే ప్రదేశంలో ఉంచడం నిందితులకు అవకాశం కల్పించిందని పోలీసులు పేర్కొన్నారు.