లోక్సభలో జనన, మరణాల నమోదు (సవరణ) బిల్లు-2026 ఆమోదం
లోక్సభలో జనన, మరణాల నమోదు (సవరణ) బిల్లు-2026 ఆమోదం
న్యూఢిల్లీ, జూలై 31: పార్లమెంట్ వర్షాకాల సమావేశాల్లో భాగంగా కేంద్ర ప్రభుత్వం మరో కీలక బిల్లును లోక్సభలో ఆమోదింపజేసుకుంది. జనన, మరణాల నమోదు (సవరణ) బిల్లు-2026కు ప్రతిపక్ష సభ్యుల నిరసనలు, సభలో నెలకొన్న కోలాహలం మధ్య ఎలాంటి విస్తృత చర్చ లేకుండానే లోక్సభ ఆమోదం తెలిపింది.
డిజిటల్ గవర్నెన్స్ను మరింత బలోపేతం చేయడంతో పాటు, పౌరుల జనన, మరణ ధృవీకరణ పత్రాల జారీ ప్రక్రియను సరళతరం చేసి ఆధునీకరించడమే ఈ సవరణ బిల్లు ప్రధాన ఉద్దేశమని కేంద్ర ప్రభుత్వం తెలిపింది.
ఈ బిల్లు అమల్లోకి వస్తే జనన, మరణాల నమోదును పూర్తిగా డిజిటల్ విధానంలో నిర్వహించే అవకాశాలు విస్తరించనున్నాయి. అలాగే జాతీయ, రాష్ట్ర స్థాయి డేటాబేస్ల మధ్య సమన్వయం మెరుగుపడి, ఆధార్, ఓటరు జాబితా, పాస్పోర్ట్, రేషన్ కార్డు వంటి పలు ప్రభుత్వ సేవలకు అవసరమైన సమాచార అనుసంధానం మరింత సులభతరం కానుంది.
లోక్సభ ఆమోదం పొందిన ఈ బిల్లు తదుపరి పరిశీలన కోసం రాజ్యసభకు వెళ్లనుంది. అక్కడ కూడా ఆమోదం పొందిన అనంతరం రాష్ట్రపతి ఆమోదంతో చట్టంగా అమల్లోకి రానుంది.
Post a Comment