సీఎం రేవంత్ రెడ్డికి కేటీఆర్ లీగల్ నోటీసు.. 48 గంటల్లో బహిరంగ క్షమాపణ చెప్పాలని డిమాండ్

హైదరాబాద్, జూలై 23: బీఆర్ఎస్ వర్కింగ్ ప్రెసిడెంట్ కే.టి. రామారావు (కేటీఆర్) తెలంగాణ ముఖ్యమంత్రి ఎ. రేవంత్ రెడ్డికి లీగల్ నోటీసు జారీ చేశారు. గ్లోబరెనా టెక్నాలజీస్ సంస్థ, పరీక్షల నిర్వహణలో జరిగిన అక్రమాలకు తనను అనుసంధానిస్తూ ముఖ్యమంత్రి చేసిన వ్యాఖ్యలు "తప్పుడు, దురుద్దేశపూర్వకమైనవి, పరువునష్టం కలిగించేవి" అని నోటీసులో పేర్కొన్నారు.

పీవీ జనని అండ్ అసోసియేట్స్ న్యాయవాదుల ద్వారా పంపిన ఈ నోటీసులో, ముఖ్యమంత్రి చేసిన వ్యాఖ్యలను వెంటనే ఉపసంహరించుకోవాలని, బహిరంగంగా ఎలాంటి షరతులు లేకుండా క్షమాపణ చెప్పాలని, భవిష్యత్తులో ఇలాంటి ఆరోపణలు పునరావృతం చేయబోమని హామీ ఇవ్వాలని డిమాండ్ చేశారు.

నోటీసు ప్రకారం, పరీక్షల అక్రమాల అంశంపై మీడియాతో మాట్లాడిన సందర్భంగా సీఎం రేవంత్ రెడ్డి ఎలాంటి ఆధారాలు చూపకుండా కేటీఆర్‌పై పలు ఆరోపణలు చేశారని, అనంతరం వాటిని సోషల్ మీడియా, ఇతర ప్రజా వేదికల ద్వారా విస్తృతంగా ప్రచారం చేశారని పేర్కొన్నారు.

ఈ వ్యాఖ్యలను టెలివిజన్ ఛానళ్లు, పత్రికలు, డిజిటల్ మీడియా, సోషల్ మీడియా విస్తృతంగా ప్రసారం చేయడంతో కేటీఆర్ ప్రతిష్ఠకు, ప్రజల్లో ఆయనకు ఉన్న విశ్వసనీయతకు తీవ్ర నష్టం జరిగిందని నోటీసులో పేర్కొన్నారు.

గ్లోబరెనా టెక్నాలజీస్ సంస్థ తనకు చెందినదని లేదా తన నియంత్రణలో ఉందని నిరూపించే న్యాయస్థాన తీర్పు, దర్యాప్తు నివేదిక, అధికారిక రికార్డు లేదా చట్టబద్ధమైన ఆధారం ఏదీ లేదని నోటీసులో స్పష్టం చేశారు. ఆ సంస్థలో తనకు ఎలాంటి ఆర్థిక లేదా యాజమాన్య సంబంధం లేదని పేర్కొన్నారు.

ముఖ్యమంత్రి చేసిన ఆరోపణల్లో గ్లోబరెనా సంస్థ కేటీఆర్ బినామీ కంపెనీ అని, ఆ సంస్థపై క్రిమినల్ చర్యలు తీసుకోకుండా ఉద్దేశపూర్వకంగా నిర్లక్ష్యం చేశారని, అనుభవ ధ్రువీకరణ పత్రం జారీ చేశారని, పరీక్షల కాంట్రాక్టులు పొందేందుకు సహకరించారని, రాజకీయ ప్రభావంతో సీబీఎస్ఈ కాంట్రాక్టులు ఇప్పించారని, విద్యార్థుల ఆత్మహత్యలకు దారితీసిన పరిణామాలకు బాధ్యుడని చేసిన వ్యాఖ్యలు పూర్తిగా అవాస్తవమని, ఎలాంటి వాస్తవ ఆధారాలు లేని పరువునష్టం కలిగించే ఆరోపణలని ఖండించారు.

తెలంగాణ శాసనసభ్యుడిగా, పరిశ్రమలు, ఐటీ, మున్సిపల్ పరిపాలన, పట్టణాభివృద్ధి శాఖల మాజీ మంత్రిగా కేటీఆర్ రాష్ట్ర అభివృద్ధికి విశేష సేవలు అందించారని, ప్రపంచవ్యాప్తంగా పెట్టుబడులను ఆకర్షించడంలో కీలక పాత్ర పోషించారని నోటీసులో పేర్కొన్నారు. అలాంటి వ్యక్తి ప్రతిష్ఠను దెబ్బతీయాలనే ఉద్దేశంతో ఈ ఆరోపణలు చేశారని ఆరోపించారు.

ముఖ్యమంత్రి వంటి రాజ్యాంగ పదవిలో ఉన్న వ్యక్తి చేసే వ్యాఖ్యలకు ప్రజల్లో విశ్వసనీయత ఉంటుందని, అలాంటి పదవిలో ఉండి ఎలాంటి ఆధారాలు లేకుండా అవినీతి, బినామీ యాజమాన్యం, అధికార దుర్వినియోగం, నేరపూరిత చర్యల ఆరోపణలు చేయడం బాధ్యతారాహిత్యమని నోటీసులో పేర్కొన్నారు.

రాజకీయ ప్రయోజనం కోసం దురుద్దేశంతో చేసిన ఈ వ్యాఖ్యలు చట్టపరంగా పరువునష్టం కలిగించే చర్యలని పేర్కొంటూ, వెంటనే బహిరంగ క్షమాపణ చెప్పాలని, అన్ని ఆరోపణలను ఉపసంహరించుకోవాలని, ఇకపై ఇలాంటి వ్యాఖ్యలు చేయకుండా ఉండాలని కేటీఆర్ డిమాండ్ చేశారు.

48 గంటల్లో ఈ డిమాండ్లను అమలు చేయకపోతే, ముఖ్యమంత్రి రేవంత్ రెడ్డిపై సివిల్, క్రిమినల్ కేసులు దాఖలు చేయడంతో పాటు నష్టపరిహారం సహా చట్టపరమైన అన్ని చర్యలు తీసుకుంటామని లీగల్ నోటీసులో హెచ్చరించారు.