కేంద్రానికి CJP మూడు డిమాండ్లు.. జేపీ నడ్డాతో భేటీలో కీలక విజ్ఞప్తులు

న్యూఢిల్లీ: నీట్ (NEET) పరీక్షల్లో జరిగిన అక్రమాలు, శాంతియుతంగా నిరసనలు చేపడుతున్న హక్కుల కార్యకర్తలపై చర్యల అంశాల నేపథ్యంలో కేంద్ర ప్రభుత్వంపై ఒత్తిడి పెరుగుతోంది. ఈ నేపథ్యంలో కేంద్ర మంత్రి జేపీ నడ్డాతో భేటీ అయిన CJP ప్రతినిధి బృందం మూడు ప్రధాన డిమాండ్లను ప్రభుత్వం ముందుంచింది.

ప్రధానంగా లడఖ్ ఉద్యమకారుడు, సామాజిక కార్యకర్త సోనమ్ వాంగ్‌చుక్‌ను తక్షణమే విడుదల చేయాలని కోరింది. అలాగే నీట్ పరీక్షల నిర్వహణలో జరిగిన వైఫల్యాలకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేయాలని డిమాండ్ చేసింది. నీట్ అవకతవకల కారణంగా మనస్తాపానికి గురై ఆత్మహత్య చేసుకున్న అభ్యర్థుల కుటుంబాలకు రూ.1 కోటి చొప్పున పరిహారం అందించాలని కూడా విజ్ఞప్తి చేసింది.

డిమాండ్లపై హామీ ఇవ్వని కేంద్రం

అయితే CJP ప్రతిపాదించిన డిమాండ్లలో ఏ ఒక్కదానిపైనా కేంద్ర ప్రభుత్వం వెంటనే హామీ ఇవ్వలేదని సమాచారం. ప్రస్తుతం కొనసాగుతున్న ఆందోళనలు, నిరసన కార్యక్రమాలను విరమించుకోవాలని మాత్రమే కేంద్ర మంత్రి జేపీ నడ్డా ప్రతినిధి బృందాన్ని కోరినట్లు తెలుస్తోంది.

దేశంలో నెలకొన్న పరిస్థితులను, విద్యార్థుల నిరసనలను కేంద్ర ప్రభుత్వం నిశితంగా గమనిస్తోందని అధికార వర్గాలు తెలిపాయి. డిమాండ్లపై స్పష్టమైన నిర్ణయం వెలువడకపోవడంతో CJP తమ ఆందోళనలను మరింత ఉధృతం చేసే అవకాశాలు కనిపిస్తున్నాయి. ఈ అంశంపై కేంద్ర ప్రభుత్వం ఎలాంటి నిర్ణయం తీసుకుంటుందన్నది ఇప్పుడు ఆసక్తికరంగా మారింది.