విద్యార్థులు లక్ష్యంతో ముందుకు సాగాలి.. నేటి కష్టమే రేపటి విజయానికి పునాది: అదనపు ఎస్పీ విక్రాంత్ కుమార్ సింగ్

 

విద్యార్థులు లక్ష్యంతో ముందుకు సాగాలి.. నేటి కష్టమే రేపటి విజయానికి పునాది: అదనపు ఎస్పీ విక్రాంత్ కుమార్ సింగ్

మెదక్: విద్యార్థులు స్పష్టమైన లక్ష్యాన్ని నిర్దేశించుకుని క్రమశిక్షణతో ముందుకు సాగితే జీవితంలో ఉన్నత శిఖరాలను అధిరోహించవచ్చని మెదక్ జిల్లా అదనపు పోలీసు సూపరింటెండెంట్ (ఏఎస్పీ) విక్రాంత్ కుమార్ సింగ్, ఐపీఎస్ అన్నారు. విద్యార్థి దశలో కష్టపడి చదవడం, మంచి అలవాట్లు పెంపొందించుకోవడం భవిష్యత్ విజయాలకు బలమైన పునాదిగా నిలుస్తుందని ఆయన పేర్కొన్నారు.

విద్యార్థులతో నిర్వహించిన అవగాహన కార్యక్రమంలో ఆయన మాట్లాడుతూ, నేటి పోటీ ప్రపంచంలో ప్రతి విద్యార్థి ఒక నిర్దిష్ట లక్ష్యంతో చదువును కొనసాగించాలని సూచించారు. "ఈరోజు చేసే కష్టమే... రేపటి విజయానికి పునాది" అనే విషయాన్ని ఎప్పటికీ గుర్తుంచుకోవాలని తెలిపారు.

మొబైల్ ఫోన్లను అవసరమైన మేరకే వినియోగించాలని, సోషల్ మీడియా, ఆన్‌లైన్ గేమ్స్ వంటి వాటికి బానిస కాకుండా సమయాన్ని చదువుకు కేటాయించాలని సూచించారు. అలాగే సైబర్ నేరాల పట్ల అప్రమత్తంగా ఉండాలని, వ్యక్తిగత వివరాలు, ఓటీపీలు, బ్యాంకు సమాచారం వంటి కీలక సమాచారాన్ని ఎవరికీ పంచుకోవద్దని హెచ్చరించారు.

మాదకద్రవ్యాలు యువత భవిష్యత్తును నాశనం చేస్తాయని, వాటికి పూర్తిగా దూరంగా ఉండాలని విద్యార్థులకు సూచించారు. మంచి స్నేహితులను ఎంచుకోవడం, తల్లిదండ్రులు, ఉపాధ్యాయుల సూచనలు పాటించడం ద్వారా జీవితంలో ఉన్నత స్థాయికి చేరుకోవచ్చన్నారు.

చదువుతో పాటు నైతిక విలువలు, క్రమశిక్షణ, సమాజం పట్ల బాధ్యతాయుతమైన దృక్పథాన్ని అలవరుచుకోవాలని విద్యార్థులకు పిలుపునిచ్చిన ఏఎస్పీ, విద్యార్థులే దేశ భవిష్యత్తు అని, వారు సత్పథంలో నడిస్తే సమాజం కూడా అభివృద్ధి చెందుతుందని పేర్కొన్నారు