సిగరెట్ షాప్‌నే టార్గెట్‌.. రూ.5.35 లక్షల చోరీ

రెక్కీ చేసి తాళాలు పగలగొట్టిన గ్యాంగ్.. సిగరెట్ బాక్సులు అమ్ముతుండగా పోలీసులకు చిక్కిన నిందితులు, ఒక్క కేసు కాదు.. ఏడు అంతర్రాష్ట్ర కేసుల లింక్

ఆదిలాబాద్, సెప్టెంబర్ 5: సిగరెట్ షాప్‌ను టార్గెట్ చేసి భారీగా సిగరెట్ బాక్సులు, నగదు చోరీ చేసిన అంతర్రాష్ట్ర ముఠా పోలీసులకు చిక్కింది. ఆదిలాబాద్ పట్టణంలోని అంబేద్కర్ చౌక్ ప్రాంతంలో ఈ చోరీ జరగగా.. నిందితులు మొత్తం రూ.5.35 లక్షల విలువైన సొత్తును అపహరించినట్లు పోలీసులు తెలిపారు.

ముందుగా సిగరెట్ షాప్‌ వద్ద రెక్కీ నిర్వహించిన నిందితులు.. రాత్రి సమయంలో షాప్‌ను లక్ష్యంగా చేసుకున్నారు. గడ్డపారతో తాళాలు పగలగొట్టి లోపలికి ప్రవేశించారు. వివిధ రకాల సిగరెట్ బాక్సులతో పాటు కౌంటర్‌లో ఉన్న నగదును ఎత్తుకెళ్లారు.

చోరీ చేసిన సిగరెట్లను వెంటనే విక్రయించి డబ్బులు చేసుకోవాలని ప్లాన్ చేశారు. ఇందులో భాగంగా హైదరాబాద్‌లోని పటాన్‌చెరులో తమకు పరిచయమైన వ్యక్తిని సంప్రదించారు. అక్కడ కొంత సొత్తును విక్రయించి వచ్చిన డబ్బును పంచుకున్నారు. మిగిలిన సిగరెట్ బాక్సులను విక్రయించి.. మరో షాప్‌లో చోరీ చేసేందుకు పథకం వేసినట్లు పోలీసులు వెల్లడించారు.

సిగరెట్లు అమ్ముతుండగా పోలీసులకు చిక్కారు

హైదరాబాద్‌ నుంచి తిరిగి ఆదిలాబాద్‌కు వచ్చిన నిందితులు ఓ షాప్‌లో సిగరెట్ బాక్సులను విక్రయిస్తుండగా పోలీసుల దృష్టిలో పడ్డారు. వివరాలు సేకరించేందుకు పోలీసులు వారి వద్దకు వెళ్లగా.. నిందితులు అక్కడి నుంచి పరుగులు తీశారు. దీంతో పోలీసులు వారిని వెంబడించి అదుపులోకి తీసుకున్నారు.

విచారణలో అంబేద్కర్ చౌక్‌లోని సిగరెట్ షాప్‌లో చోరీ చేసింది తామేనని నిందితులు అంగీకరించినట్లు పోలీసులు తెలిపారు.

నిందితుల నుంచి చోరీకి గురైన సిగరెట్ బాక్సులతో పాటు రూ.60 వేల నగదు, మారుతి వ్యాగన్-ఆర్ కారు, సెల్‌ఫోన్లు, గడ్డపార, హ్యాండిల్ స్వాధీనం చేసుకున్నట్లు పోలీసులు వెల్లడించారు. స్వాధీనం చేసుకున్న సిగరెట్లలో అమెరికన్ సిగరెట్లు, కింగ్ సైజ్ గోల్డ్, లైట్ గోల్డ్ ఫ్లేక్, స్మాల్ గోల్డ్ ఫ్లేక్, బ్రిస్టల్, క్లాసిక్ మిల్డ్స్ రెడ్, ఓల్డ్ ఎడిషన్, ఐస్ బరస్ట్, కనెక్ట్, సిల్క్ తదితర బ్రాండ్లు ఉన్నట్లు తెలిపారు.

ఏడు అంతర్రాష్ట్ర కేసులు.. బయటపడ్డ గ్యాంగ్ చరిత్ర

విచారణలో ఈ ముఠా గతంలోనూ పలు ప్రాంతాల్లో చోరీలకు పాల్పడినట్లు వెల్లడైంది. మహారాష్ట్రలోని ఛత్రపతి శంభాజీనగర్–హైదరాబాద్ హైవే పక్కన ఉన్న ఓ పాన్ డబ్బాను పగలగొట్టి నగదు చోరీ చేసినట్లు కూడా నిందితులు వెల్లడించినట్లు పోలీసులు తెలిపారు.

నిందితులపై ఇప్పటికే ఏడు అంతర్రాష్ట్ర కేసులు ఉన్నట్లు పోలీసులు గుర్తించారు. ముఠాలోని నలుగురు రాజస్థాన్‌లోని పాలి జిల్లా జైతారన్ ప్రాంతానికి చెందినవారు కాగా.. మరో నిందితుడు పటాన్‌చెరుకు చెందిన వ్యక్తిగా గుర్తించారు.

సులభంగా డబ్బు సంపాదించాలనే ఉద్దేశంతో స్నేహితులతో కలిసి రాష్ట్రాలు దాటి చోరీలకు పాల్పడుతున్నట్లు పోలీసుల విచారణలో తేలినట్లు అధికారులు తెలిపారు.