బిగ్ బ్రేకింగ్.. మనీలాండరింగ్ కేసులో ఎమ్మెల్యే అరికపూడి గాంధీకి ఈడీ సమన్లు

బిగ్ బ్రేకింగ్.. మనీలాండరింగ్ కేసులో ఎమ్మెల్యే అరికపూడి గాంధీకి ఈడీ సమన్లు

రూ.842 కోట్ల మోసం జరిగినట్లు ఈడీ అంచనా.. సెప్టెంబర్ 27న హాజరు కావాలని ఆదేశాలు

హైదరాబాద్: సాహితి ఇన్‌ఫ్రాటెక్ వెంచర్స్ ఇండియా ప్రైవేట్ లిమిటెడ్‌కు సంబంధించిన మనీలాండరింగ్ కేసులో శేరిలింగంపల్లి ఎమ్మెల్యే అరికపూడి గాంధీకి ఎన్‌ఫోర్స్‌మెంట్ డైరెక్టరేట్ (ఈడీ) సమన్లు జారీ చేసినట్లు సమాచారం. సెప్టెంబర్ 27న విచారణకు హాజరు కావాలని ఈడీ ఆదేశించినట్లు తెలుస్తోంది.

సాహితి ఇన్‌ఫ్రా సంస్థకు సంబంధించిన లావాదేవీలపై దర్యాప్తు చేస్తున్న ఈడీ.. ఎమ్మెల్యే బ్యాంకు ఖాతాల ద్వారా సాహితి ఇన్‌ఫ్రా నుంచి సుమారు రూ.2.1 కోట్లు మళ్లించినట్లు వచ్చిన ఆరోపణలపై ఆరా తీస్తున్నట్లు సమాచారం. ఈ నగదు లావాదేవీల స్వభావం, ఉద్దేశం ఏమిటనే అంశాలపై అధికారులు దృష్టి సారించినట్లు తెలుస్తోంది.

రూ.842 కోట్ల మోసం?

ఫ్లాట్లు, విల్లాలు నిర్మించి ఇస్తామని హామీ ఇచ్చి కొనుగోలుదారుల నుంచి డబ్బులు వసూలు చేసి, ప్రాజెక్టులను సకాలంలో పూర్తి చేయలేదనే ఆరోపణలు సాహితి ఇన్‌ఫ్రాపై ఉన్నాయి. తెలంగాణ పోలీసులు నమోదు చేసిన పలు ఎఫ్‌ఐఆర్‌ల ఆధారంగా ఈడీ మనీలాండరింగ్ దర్యాప్తు చేపట్టినట్లు సమాచారం.

తొలుత సాహితి ఇన్‌ఫ్రా ప్రాజెక్టుల్లో సుమారు రూ.248 కోట్ల మేర మోసం జరిగినట్లు ఆరోపణలు వచ్చాయి. తదుపరి దర్యాప్తులో ఈ మొత్తం సుమారు రూ.842 కోట్లకు చేరినట్లు ఈడీ అంచనా వేసినట్లు సమాచారం.

ప్రీ-లాంచ్ ఆఫర్లతో భారీగా నిధుల సేకరణ

ప్రీ-లాంచ్ ఆఫర్ల పేరుతో కొనుగోలుదారుల నుంచి భారీ మొత్తంలో నిధులు సేకరించి, వాటిని సంస్థకు సంబంధించిన వ్యక్తిగత, కుటుంబ సభ్యుల ఖాతాలకు మళ్లించినట్లు దర్యాప్తులో ఆరోపణలు నమోదయ్యాయి. సుమారు రూ.126 కోట్ల నిధుల దుర్వినియోగం జరిగినట్లు ఈడీ ఆరోపించినట్లు సమాచారం.

సంస్థ ఎండీ బి. లక్ష్మీనారాయణ, మాజీ డైరెక్టర్ సందు పూర్ణచంద్రరావు తదితరులపై కూడా దర్యాప్తు కొనసాగుతోంది. బినామీ పేర్లతో ఆస్తులు కొనుగోలు చేసినట్లు దర్యాప్తులో గుర్తించినట్లు ఈడీ పేర్కొన్నట్లు సమాచారం.

ఆస్తులు, బ్యాంకు ఖాతాలపై ఈడీ చర్యలు

ఇప్పటివరకు 56 బ్యాంకు ఖాతాలను ఫ్రీజ్ చేసినట్లు సమాచారం. గతంలో సుమారు రూ.161 కోట్ల విలువైన ఆస్తులను, మరో విడతలో రూ.12.6 కోట్ల విలువైన ఆస్తులను ఈడీ అటాచ్ చేసినట్లు తెలుస్తోంది.

సాహితి ఇన్‌ఫ్రా సంస్థ ప్రకటనల్లో కనిపించిన సినీ నటుడు జగపతిబాబును సైతం ఈడీ సాక్షిగా విచారించినట్లు సమాచారం. సంస్థ ఎండీ బి. లక్ష్మీనారాయణను 2024 సెప్టెంబర్‌లో ఈడీ అరెస్ట్ చేసిన విషయం తెలిసిందే.

ప్రస్తుతం ఎమ్మెల్యే అరికపూడి గాంధీకి సంబంధించిన రూ.2.1 కోట్ల లావాదేవీలపై ప్రధానంగా దృష్టి సారించిన ఈడీ, వాటికి మనీలాండరింగ్ నెట్‌వర్క్‌తో ఏమైనా సంబంధం ఉందా, నిధుల అసలు స్వరూపం ఏమిటి అనే అంశాలను పరిశీలిస్తున్నట్లు సమాచారం.