నేడు భారీ నుంచి అతిభారీ వర్షాలు.. తెలంగాణకు ఆరెంజ్ అలర్ట్ జారీ

హైదరాబాద్, : బంగాళాఖాతంలో ఏర్పడిన అల్పపీడనం ప్రభావంతో రాష్ట్ర వ్యాప్తంగా వర్షాలు కురుస్తున్నాయి. ఇప్పటికే వారం రోజులుగా కురుస్తున్న కుండపోత వానలతో వాగులు, వంకలు పొంగిపొర్లుతున్నాయి. లోతట్టు ప్రాంతాలు జలమయం అవుతున్నాయి. రవాణా, విద్యుత్ సరఫరాపై తీవ్ర ప్రభావం పడింది.

భారత వాతావరణ శాఖ (ఐఎండీ) తాజా బులెటిన్‌లో తెలిపిన ప్రకారం, నేడు తెలంగాణలోని పలు జిల్లాల్లో భారీ నుంచి అతిభారీ వర్షాలు కురిసే అవకాశం ఉంది. ఉరుములు, మెరుపులతో కూడిన వర్షపాతం నమోదయ్యే అవకాశముందని హెచ్చరించింది.

ఆరెంజ్ అలర్ట్ జారీ

కరీంనగర్, జగిత్యాల, జయశంకర్ భూపాలపల్లి, పెద్దపల్లి, మంచిర్యాల, ములుగు, మహబూబాబాద్, నిర్మల్, నిజామాబాద్ జిల్లాల్లో ఈరోజు అతి భారీ వర్షాలు కురుస్తాయని వాతావరణ శాఖ తెలిపింది. ఈ జిల్లాలకు ఆరెంజ్ అలర్ట్ ప్రకటించింది. రేపు (ఆదివారం) కూడా రాష్ట్రంలోని మరికొన్ని జిల్లాల్లో భారీ వర్షాలు పడే అవకాశముందని వెల్లడించింది.

ప్రజలకు సూచనలు

వర్షాల సమయంలో అత్యవసర పనులు తప్ప బయటకు వెళ్లరాదని, వాగులు వంకలు దాటే ప్రయత్నం చేయరాదని అధికారులు సూచించారు. లోతట్టు ప్రాంతాల ప్రజలు అప్రమత్తంగా ఉండాలని, విద్యుత్ తీగలు, చెట్లు కూలే ప్రమాదం ఉన్నందున జాగ్రత్తలు తీసుకోవాలని హెచ్చరించారు.