కోటి రూపాయల బీమా కోసం తాను చనిపోయినట్టు నాటకం వేసి అమాయకుడిని సజీవ దహనం

ప్రియురాలికి మెసేజ్‌లు పంపి దొరికిపోయిన నిందితుడు

ముంబై / మహారాష్ట్ర: కోటి రూపాయల జీవిత బీమా డబ్బులు కాజేయాలనే దురాశ ఓ వ్యక్తిని అత్యంత దారుణమైన నేరానికి దారి తీసింది. తాను చనిపోయినట్టు కుటుంబ సభ్యులు, పోలీసులను నమ్మించేందుకు ఓ అమాయకుడిని కారులో సజీవంగా దహనం చేశాడు. అయితే ప్రియురాలికి పంపిన కొన్ని మెసేజ్‌లు అతడి కుట్రను బయటపెట్టాయి. ఈ సంచలన ఘటన మహారాష్ట్రలో చోటుచేసుకుంది.

తాను చనిపోయినట్టు నాటకం

నిందితుడు చవాన్ తనపై ఉన్న ఇంటి రుణాన్ని తీర్చేందుకు రూ. కోటి విలువైన జీవిత బీమా డబ్బులు పొందాలని పథకం రచించాడు. ఇందుకోసం తానే చనిపోయినట్టు నాటకం వేసి, ప్రమాదంగా చూపించాలని నిర్ణయించాడు.

అమాయకుడికి లిఫ్ట్.. తర్వాత దారుణం

శనివారం రాత్రి గోవింద్ యాదవ్ అనే హిచ్‌హైకర్‌కు చవాన్ లిఫ్ట్ ఇచ్చాడు. మద్యం మత్తులో ఉన్న గోవింద్‌ను కారు డ్రైవర్ సీట్లో కూర్చోబెట్టి, వాహనానికి నిప్పంటించి సజీవంగా దహనం చేశాడు. మృతదేహం తనదేనని నమ్మించేందుకు తన బ్రాస్‌లెట్‌ను కూడా కారులోనే వదిలేశాడు.

కుటుంబం శోకసంద్రంలో.. ట్విస్ట్

ఈ ఘటన తర్వాత చవాన్ కుటుంబ సభ్యులు అతడు చనిపోయాడని భావించి కన్నీళ్లు పెట్టుకున్నారు. అంతా ముగిసినట్టే అనుకున్న సమయంలో నిందితుడు చేసిన ఓ చిన్న తప్పిదం అతడిని బయటపెట్టింది.

ప్రియురాలికి మెసేజ్‌లు

తాను సురక్షితంగా ఉన్నట్టు ప్రియురాలికి మెసేజ్‌లు పంపడం పోలీసులకు అనుమానం కలిగించింది. కాల్ డేటా, టెక్నికల్ ఆధారాలతో దర్యాప్తు చేపట్టిన పోలీసులు చివరకు చవాన్‌ను అదుపులోకి తీసుకున్నారు.

నేరం అంగీకారం

పోలీసుల విచారణలో చవాన్ తన నేరాన్ని అంగీకరించాడు. బీమా డబ్బుల కోసమే ఈ హత్య చేశానని ఒప్పుకున్నాడు. ప్రస్తుతం చవాన్‌పై హత్య, సాక్ష్యాల నాశనం, మోసం తదితర సెక్షన్ల కింద కేసులు నమోదు చేసి దర్యాప్తు కొనసాగిస్తున్నారు.