నకిలీ డీఏపీ దందా కలకలం.. రైతులను మోసం చేస్తున్న అక్రమార్కులు

 

నాగర్‌కర్నూల్‌లో నకిలీ డీఏపీ దందా కలకలం.. రైతులను మోసం చేస్తున్న అక్రమార్కులు

కల్వకుర్తి, జూలై 22: రైతులను లక్ష్యంగా చేసుకుని నకిలీ డీఏపీ ఎరువుల దందా నాగర్‌కర్నూల్ జిల్లాలో కలకలం రేపుతోంది. డీఏపీ ఎరువుల ధరలు పెరిగిన పరిస్థితిని ఆసరాగా చేసుకున్న అక్రమార్కులు, తక్కువ ధరకు అసలైన డీఏపీ ఇస్తున్నామని నమ్మించి నకిలీ ఎరువులను విక్రయిస్తున్నట్లు వెలుగులోకి వచ్చింది.

మట్టి, ఇతర రసాయనాలతో తయారు చేసిన నకిలీ ఎరువులను ఇఫ్కో కంపెనీ "భారత్ డీఏపీ" పేరుతో ఆకర్షణీయమైన ప్యాకింగ్‌లో సిద్ధం చేసి, బస్తాలపై ప్రధాని నరేంద్ర మోదీ ఫొటో ముద్రించి రైతులను మోసం చేస్తున్నట్లు అధికారులు గుర్తించారు. అసలు సంచుల్లాగే ప్యాకింగ్ ఉండడంతో రైతులు మోసపోతున్నారు.

వరుసగా పట్టుబడుతున్న నకిలీ డీఏపీ బస్తాలు

గత మూడు, నాలుగు రోజుల వ్యవధిలోనే నాగర్‌కర్నూల్ జిల్లాలో భారీ మొత్తంలో నకిలీ డీఏపీ బస్తాలు స్వాధీనం అయ్యాయి. బిజినేపల్లి మండలం మహదేవునిపేటలో 111 బస్తాలు, తాడూరు మండలం ఆకునెల్లికుదురులో మరో 80 బస్తాలను పోలీసులు స్వాధీనం చేసుకున్నారు.

రాత్రి వేళల్లో వాహనాల ద్వారా ఎరువులను తీసుకొచ్చి, "కంపెనీ నుంచి నేరుగా తెచ్చాం.. పాత ధరకే ఇస్తున్నాం" అంటూ రైతులను నమ్మించి ఒక్కో బస్తాను సుమారు రూ.1,600కు విక్రయిస్తున్నట్లు సమాచారం.

స్థానిక సహకారంపై అనుమానాలు

నకిలీ డీఏపీ దందా వెనుక స్థానికంగా కొందరు ప్రభావశీలుల సహకారం ఉండొచ్చనే అనుమానాలు వ్యక్తమవుతున్నాయి. స్థానిక మద్దతు లేకుండా బయటి వ్యక్తులు ఇంత పెద్ద ఎత్తున అక్రమ వ్యాపారం నిర్వహించడం సాధ్యం కాదని అధికారులు భావిస్తున్నారు. ఈ వ్యవహారంలో అధికార పార్టీకి చెందిన కొందరు నాయకుల పాత్రపై కూడా అనుమానాలు వ్యక్తమవుతున్నప్పటికీ, దీనిపై అధికారికంగా ఎలాంటి నిర్ధారణ లేదు.

పోలీసుల దర్యాప్తు ముమ్మరం

ఈ కేసులో ఇప్పటికే పలువురిపై కేసులు నమోదు చేసిన పోలీసులు, నకిలీ ఎరువుల తయారీ, రవాణా, నిల్వ, విక్రయాలపై లోతుగా దర్యాప్తు చేస్తున్నారు. నకిలీ ఎరువులు ఎక్కడ తయారవుతున్నాయి, ఎవరు సరఫరా చేస్తున్నారు, స్థానికంగా ఎవరు సహకరిస్తున్నారు అనే అంశాలపై వివరాలు సేకరిస్తున్నారు.

స్వాధీనం చేసుకున్న ఎరువుల నమూనాలను ప్రయోగశాలకు పంపించినట్లు సమాచారం. నివేదికల ఆధారంగా మరిన్ని కేసులు నమోదు చేసే అవకాశముండగా, విచారణలో వెలుగులోకి వచ్చే వివరాల మేరకు మరికొందరిని అదుపులోకి తీసుకునే అవకాశం ఉందని తెలుస్తోంది.

రైతులకు అధికారుల సూచనలు

వ్యవసాయ అధికారులు రైతులు గుర్తింపు పొందిన ఎరువుల దుకాణాల నుంచే ఎరువులు కొనుగోలు చేయాలని, అనుమానాస్పదంగా తక్కువ ధరకు విక్రయించే ఎరువులను కొనొద్దని సూచిస్తున్నారు. కొనుగోలు సమయంలో తప్పనిసరిగా బిల్లు తీసుకోవాలని, అనుమానం వచ్చిన వెంటనే వ్యవసాయ శాఖ లేదా పోలీసులకు సమాచారం అందించాలని కోరుతున్నారు.