ఆగస్టు 6 నుంచి 12 వరకు సీపీఐ ప్రజా చైతన్య యాత్రలు.. సెప్టెంబర్ 1న 'ఛలో ఢిల్లీ'కి పిలుపు

 

ఆగస్టు 6 నుంచి 12 వరకు సీపీఐ ప్రజా చైతన్య యాత్రలు.. సెప్టెంబర్ 1న 'ఛలో ఢిల్లీ'కి పిలుపు

భద్రాద్రి కొత్తగూడెం జిల్లాలో భారత కమ్యూనిస్టు పార్టీ (సీపీఐ) ఆధ్వర్యంలో ఆగస్టు 6 నుంచి 12 వరకు జిల్లా వ్యాప్తంగా ప్రజా చైతన్య యాత్రలు నిర్వహించనున్నట్లు జిల్లా సమితి ప్రకటించింది. కేంద్రంలోని ఎన్డీఏ ప్రభుత్వం అనుసరిస్తున్న ప్రజా వ్యతిరేక విధానాలను నిరసిస్తూ, ప్రజా సమస్యల పరిష్కారం కోసం ఈ యాత్రలు చేపడుతున్నట్లు వెల్లడించింది. అలాగే సెప్టెంబర్ 1న నిర్వహించే "ఛలో ఢిల్లీ" కార్యక్రమాన్ని విజయవంతం చేయాలని ప్రజలకు పిలుపునిచ్చింది.

సీపీఐ విడుదల చేసిన ప్రకటనలో నిత్యావసర వస్తువులు, పెట్రోల్, డీజిల్, గ్యాస్ ధరల పెరుగుదలను అరికట్టాలని, రైతులకు పంటలకు కనీస మద్దతు ధరకు చట్టబద్ధత కల్పించాలని, మహిళా రిజర్వేషన్‌ను వెంటనే అమలు చేయాలని డిమాండ్ చేసింది. ప్రభుత్వ శాఖల్లో ఖాళీ ఉద్యోగాలను భర్తీ చేయడం, విద్యావ్యవస్థను ప్రక్షాళన చేయడం, బ్యాలెట్ పేపర్ విధానంలో ఎన్నికలు నిర్వహించడం, దళితులు, ఆదివాసీలపై దాడులను అరికట్టాలని కోరింది.

భద్రాద్రి కొత్తగూడెం జిల్లా సమస్యలపై కూడా సీపీఐ ప్రత్యేకంగా డిమాండ్లు చేసింది. పెండింగ్‌లో ఉన్న పోడు పట్టాలను వెంటనే జారీ చేయాలని, అర్హులైన పేదలకు ఇందిరమ్మ ఇండ్లు, ఇంటి స్థలాలు ఇవ్వాలని, సీతారామా, సీతమ్మధార ప్రాజెక్టుల ద్వారా జిల్లాకు సాగునీరు అందించాలని, భూములు కోల్పోయిన నిర్వాసితులకు తగిన పరిహారం చెల్లించాలని, అశ్వారావుపేట నిర్వాసితులకు న్యాయం చేయాలని పేర్కొంది. అలాగే పాల్వంచ కేటీపీఎస్‌లో 800×2 మెగావాట్ల పవర్ ప్లాంట్ నిర్మాణం, తాలిపేరు ప్రాజెక్టు మరమ్మత్తులు, కార్మికులకు ఈఎస్ఐ ఆస్పత్రి ఏర్పాటు, కాంట్రాక్ట్ కార్మికుల శాశ్వతీకరణ వంటి డిమాండ్లను కూడా ప్రస్తావించింది.

ఈ ప్రజా చైతన్య యాత్రల్లో కేంద్ర ప్రభుత్వ విధానాలు, పెరుగుతున్న ధరలు, నిరుద్యోగం, ప్రభుత్వ రంగ సంస్థల ప్రైవేటీకరణ, రైతు-కార్మిక సమస్యలు, విద్యా-వైద్య రంగాల పరిస్థితి, మహిళల భద్రత, దళితులు, ఆదివాసీలపై దాడులు, రాష్ట్రంలో పెండింగ్‌లో ఉన్న ప్రజా సమస్యలు, ఎన్నికల హామీల అమలుపై ప్రజలకు అవగాహన కల్పించనున్నట్లు సీపీఐ తెలిపింది.

ప్రజలు, రైతులు, కార్మికులు, యువజనులు, విద్యార్థులు, మహిళలు, మేధావులు, ప్రజాస్వామ్యవాదులు పెద్ద సంఖ్యలో పాల్గొని ఆగస్టు 6–12 ప్రజా చైతన్య యాత్రలను మరియు సెప్టెంబర్ 1న జరిగే 'ఛలో ఢిల్లీ' కార్యక్రమాన్ని విజయవంతం చేయాలని భారత కమ్యూనిస్టు పార్టీ (సీపీఐ) భద్రాద్రి కొత్తగూడెం జిల్లా సమితి విజ్ఞప్తి చేసింది.