23 ఏళ్లకే ‘డాక్టర్’ అవతారం.. ఫేక్ క్లినిక్ గుట్టురట్టు

హైదరాబాద్: వైద్య అర్హతలు లేకుండానే ‘డాక్టర్‌’గా చలామణి అవుతూ ప్రజలకు వైద్యం చేస్తున్నట్లు ఆరోపణలు ఎదుర్కొంటున్న 23 ఏళ్ల యువకుడిని హైదరాబాద్ టాస్క్‌ఫోర్స్, గోల్కొండ పోలీసులు అరెస్ట్ చేశారు. గోల్కొండ పరిధిలోని హిక్మా సెహత్ కేర్ సెంటర్‌పై పోలీసులు దాడి చేసి మహమ్మద్ అద్నాన్‌ను అదుపులోకి తీసుకున్నారు.

పోలీసుల వివరాల ప్రకారం.. ఎలాంటి గుర్తింపు పొందిన వైద్య అర్హతలు లేకుండానే అద్నాన్ ఛాతీనొప్పి, శ్వాస సంబంధిత సమస్యలు, కిడ్నీ, యూరినరీ సమస్యలకు చికిత్స అందిస్తున్నట్లు ఆరోపణలు ఉన్నాయి. క్లినిక్‌లో తనను వైద్యుడిగా పరిచయం చేసుకుంటూ రోగులకు మందులు, ప్రిస్క్రిప్షన్లు అందించినట్లు పోలీసులు పేర్కొన్నారు.

దాడి సమయంలో క్లినిక్‌లో చేతిరాత కోడ్‌లతో ఉన్న లేబుల్స్ లేని మందుల బాటిళ్లు, ప్యాకెట్లు, ప్రిస్క్రిప్షన్ పుస్తకాలు, సోషల్ మీడియా ప్రచారానికి సంబంధించిన సామగ్రిని పోలీసులు స్వాధీనం చేసుకున్నట్లు తెలిపారు.

ఈ వ్యవహారంలో అద్నాన్ తల్లి, సోదరుడి పాత్ర కూడా ఉన్నట్లు పోలీసులు అనుమానిస్తున్నారు. ప్రస్తుతం వారు పరారీలో ఉన్నట్లు పేర్కొన్నారు. ఈ ఘటనపై సంబంధిత భారతీయ న్యాయ సంహిత (BNS) సెక్షన్ల కింద కేసు నమోదు చేసి దర్యాప్తు కొనసాగిస్తున్నారు.